संघीय समाजवादी पार्टीं समावेशी घोषणापत्र सार्वजनिक
अशोक राई नेतृत्वया संघीय समाजवादी पार्टीं थौं थःगु चुनावी घोषणापत्र सार्वजनिक याःगु दु । समावेशी राष्ट्रपति प्रणाली व झिंप्यंगू प्रदेशया संघीय संरचनालिसेया चुनावी घोषणापत्र थौं सार्वजनिक याःगु खः ।
पहिचानलिसेया संघीयता, आर्थिक क्रान्ति व समतामूलक विकासयात मू एजेण्डा दयेकूगु संघीय समाजवादीं एकीकृत माओवादी, कांग्रेस, एमालेया असक्षमताया हे हुनिं संविधान दयेके मफुगु द्वपं नापं ब्यूगु दु ।
संघीय समाजवादी पार्टीं थःगु घोषणापत्रय् न्हापाया संविधानसभाया राज्यया पुनर्संरचना सम्बन्धी समितिं तयार याःगु झिंप्यंगू प्रदेशया प्रस्तावयात हे राज्य पुनर्संरचनाया प्रस्ताव हे न्ह्यःने न्ह्याकूगु दु ।
अथेहे, उगु पार्टीं राष्ट्रपति प्रत्यक्ष निर्वाचित जुइकथं समावेशी राष्ट्रपतीय प्रणालीया प्रस्ताव न्ह्यःने न्ह्याकूगु दु । राष्ट्रपति व उपराष्ट्रपति छगू हे प्रदेशपाखें जुइमज्यूगु लिसे उमिगु जाति लिसे समुदाय व लिङ्ग नं ब्यागलं जुइमाःगु प्रस्ताव समाजवादीया दु । उमिसं राष्ट्रपतिया ग्वाहालिया रुपय् प्रधानमन्त्री जुइगु न्ह्यःथंगु दु ।
संघीय समाजवादीं केन्द्रय् प्रतिनिधि सभा व राज्य सभा यानाः निगू सदनात्मक व्यवस्था प्रस्ताव याःगु दु । प्रत्यक्षपाखें ख्वीच्यागू जिल्लाय् उम्मेदवारी ब्यूगु संघीय समाजवादी पार्टीं वइगु संविधानसभाय् थःपिं प्यंगूगु शक्ति जुइगु दाबी नापं याःगु दु ।
