अन्यौल नेवाः देय् दबू व पार्टीया उम्मेदवार

कृष्ण प्रजापती

नेवाः देय् दबूया अधिवेशन पूवने मफया स्थगन जूवंगु खँ झी सकसिनं सियागु हे खँ खः । वंगु दँया असोज ६, ७ व ८ गते येँय् स्वन्हुयंकंया अधिवेशनं न्हूगु नेतृत्व ल्यये मफुत । आः वया पाय्छि दच्छि लिपा वय्कःपिनिगु पहचह स्वयेबलय् झी नेवाःतय्त हे जक अलमल यायेत जकं थ्व अधिवेशनं न्हूगु नेतृत्व ल्यये मफुगु थें क्यंगु मखुला धइगु खनेदु । पाय्छि लच्छि लिपा वइगु मंसीर ४ गते जुइगु संविधानसभाया निक्वःगु चुनावय् नेवाः देय् दबूया नायः कथं न्ह्यब्वयातःपिं नरेश ताम्रकार व पवित्र बज्राचार्य निम्हं हे छगू हे राजनीतिक पार्टीपाखें चुनावय् दनाच्वंगु दु । थ्व ल्याखं ला वय्कःपिं निम्हं छगू हे राजनीतिक आस्था दुपिं धायेमाल । नेवाः देय् दबूया चुनावय् वा अधिवेशनय् निकततम प्रतिद्वन्दि कथं न्ह्य:ने वयाच्वंपिं नरेश ताम्रकार व पवित्र बज्राचार्यपिं आखिर संघीय समाजवादी पार्टीया उम्मेदवार कथं येँय्या निगू क्षेत्रं छगू हे पार्टीं उम्मेदवार बीवं धाःसा आः वया नेवाःतय् दथुइ चर्चा सुरु जूगु दु ।

छगू हे राजनीतिक पार्टीया नेतात जूगु ल्याखं नेवाः देय् दबूया विवाद यदि उगु पार्टीं चाहे जूगु खःसा समाधान यायेफुगु जुयाच्वन धइगु ला सीदुगु हे खँ जुल । नेपाः राष्ट्रिय पार्टी दयेकं दयेकं नेवाः न्ह्यलुवा धाःपिं थ्व निम्ह नेतात अथे मेगु हे पार्टीपाखें येँय्या निगू क्षेत्रं उम्मेदवारी बियाः थःपिनि पार्टी प्रचार नापं उम्मेदवारया प्रचार याना जुइवं नेवाःतय्त झंग लाइपिं मेपिं मखुसें नेवाःत हे जुयाच्वन धइगु क्यं । सामान्य मनूतय्सं हे थुइगु कथं संघीय समाजवादी पार्टीया उम्मेदवारत निम्ह नेवाः देय् दबूया चुनाव जूबलय् निगू हे पाइनल खडा याना ल्वानाच्वंगु धइगु ला नेवाःतय्त झंग लायेत स्वःगु हे खः धइगु क्यं । उकिं कि नेवाः देय् दबूया उम्मेदवारय् छम्हेसिनं मेम्हेसित समर्थन याना वा मिले जुयाः नेवाःत छप्पँ खः धइगु क्यनेत थ्व नेतात सक्षम जुइमाल । मखुसा नेवाः देय् दबूया अधिवेशनय् थें अलग्ग अलग्ग पार्टी, विचार व सिद्धान्त ज्वनाः जक थुगु संविधानसभाया चुनावय् थःपिं न्ह्य:ने वयेमाःगु खः । खय्त ला पवित्र बज्रचार्य थेंज्याःम्ह छम्ह पवित्र मनुखं अब्ले सुद्र्यः चिं कयाः २३ वडाया वडा अध्यक्ष थेंज्याःगु गरिमामय पदय् आसिन जूगु इलय् नं स्वतन्त्र रुपं हे उम्मेदवारी ब्यूगु जूसां उम्ह मनू चुनावय् त्याकेफुम्ह खः, वयात छाय् एमालेया सुद्र्यः चिं कायेमाल धकाः ला न्ह्यसः ब्वलंगु हे खः ।

आः वयाः छगू हे पार्टी संघीय समाजवादी पार्टीपाखें पवित्र बज्राचार्य व नेवाः देय् दबूया नायः जुयाच्वनादीम्ह नरेश ताम्रकार नं उम्मेदवारी बिउगु व छगू हे राजनीतिक पार्टीया झण्डा ज्वनाः उपिं चुनावी मैदानय् खने दयेक: वयाच्वंगुलिं यानाः आः झीगु देशय् चुनाव, आन्दोलन व मेमेगु न्ह्यागु नं इलय् नेतात थवंथः मिले जु तर जनतायात ध्वँ लायेत हे जक इपिं थवंथः ल्वानाच्वंपिं थें खने दयेका वइपिं जुयाच्वन धइगु क्यं । म्हिगः नं पवित्र बज्राचार्य नेवाः देय् दबूया महासचिव जुइधुंकूम्ह व्यक्ति खः । अथे जुयाः वय्कः नेवाः देय् दबूया लागिं नायः जुयाः ज्या याये ल्वःम्ह व्यक्तित्व हे खः । नापं छगू कार्यकाल नेवाः देय् दबूया नायः जुयाः सक्षम नेतृत्व यानादीम्ह नरेश ताम्रकार नं नेवाः देय् दबूयात सक्षम नेतृत्व प्रदान याये धुंकूम्ह व्यक्ति जूगु ल्याखं उम्ह मनूयात नं अयोग्य तायेके मजिउ । अथे जूसां नायः पद धइगु छगू हे जक दइगु जूगु ल्याखं निम्ह नेवाः नेतातय् दथुइ सु नेता जुइगु धइगु खँ सहमतिइ वयेमाःगु खः । खुलाया दुने चुनाव सम्पन्न याये धकाः अब्ले चुनावयात स्थगन याना वा अधिवेशन क्वचाःसां चुनाव क्वमचायेकुसें तयातःगु धइगु नेवाः नेतातय् असक्षमता हे खः ।

शरद कसाः संयोजक जुयादीगु दवाव समूह व पद्मरत्न तुलाधर संयोजक जूगु विवाद समाधान समितिपाखें नं छुं निश्कर्ष पित बिये मफयाच्वंगु थ्व इलय् निम्ह नेतात हाकनं छक्वः थःपिं नेवाः नेतात खः, थःपिं संघीय समाजवादी पार्टीया दिग्गज नेतात खः व थःपिं हे जक नेवाःतय् निंतिं निर्विकल्प खः धइगु राग हालाच्वंगु स्थिति दु । थज्याःगु छगू संवेदनशील घडिइ नं यदि नेवाःतय् मत कायेगु खःसा नेवाः पार्टी कथं नीस्वंगु नेपाः राष्ट्रिय पार्टीपाखें हे उम्मेदवारी दर्ता याकेमाःगु खः । मखु धइगु जूसा उपिं निगू अलग्ग अलग्ग पार्टीया उम्मेदवार जुइ फयेकेमाःगु खः । छगू हे पार्टीया नेतात नेवाः देय् दबूया चुनाव जुइगु इलय् धाःसा नेवाःतय्त छले यायेथें निगू ध्रुवय् विभक्त जुयाक्यनेगु पाय्छि खँ मखु । झी सक्षम जूसा झीत सुना नं ख्याये फइमखु । फगत थन नेवाःत हे सक्षम जुइमाःगु दु । नेवाःत सक्षम, योग्य व युद्ध खना नं मग्याःपिं जाति जूगु हे ल्याखं किपू, ख्वप थेंज्याःगु देय् पृथ्वीनारायण शाहया पालाय् युद्ध यायेत तकं मग्याःगु खः । तर आः झीगु हे कारणं यानाः झीगु बेइज्जत जुइगु स्थिति ब्वलनाच्वंगु दु । झी थवंथः ल्वाना हे मेपिंत सुख बियाच्वनागु जुयाच्वना ।

नेवाःत न्हापांनिसें इमान्दार व योग्य नागरिक कथं नेपाली समाजय् खने दुपिं खः । राजनीतिक व सामाजिक रुपं नं इपिं उच्च जाति जूगुया ल्याखं झीगु देशय् खनेदइगु गुलिं राजनीतिक परिवर्तनया अन्तिम निर्णायक शक्ति धाःसा न्ह्याब्लें नेवाःत हे जक जुयाच्वनी । अथे जुयाः नं झीगु राजनीतिक धारणा छु खः धइगु मेमेगु पार्टी व समाजं ध्यान तयाः स्वइगु स्वाभाविक खः । थन धाये त्यनागु खँ समाज परिवर्तन नापनापं झीगु परिवर्तन नं अति आवश्यक जूगु ल्याखं झीगु देशय् खने दइगु हरेक राजनीतिक पार्टीया न्ह्यलुवा नेवाःतय् हिउपा नं उलि हे आवश्यक खनेदु । झीगु देशय् सक्षम नेतृत्व धइगु नेवाःतय्पाखें ताः ई न्ह्यःनिसें हे खने दयाच्वंगु दु । उकिं आः थीथी राजनीतिक पार्टीया नेता कथं झी नेवाः नेतात खने दयेकः वयाच्वंगु दु । गुलिं राजनीतिक पार्टीइ नेवाःतय् हे बर्चश्व दु । नेपाः राष्ट्रिय पार्टी बाहेक नं नेपाल मजदुर किसान पार्टी थेंज्याःगु अध्यक्ष, उपाध्यक्ष व सचिव हे नेवाः नेतात जुयाच्वंगु पार्टी नं झीथाय् दु । थज्याःगु फुक्कं खँयात ध्यानय् तयाः नेवाःत मिले जुयाः वनेगु व्यवहारिक पक्ष नेवाः देय् दबूया न्ह्यलुवातय्सं स्वयेमाः ।