सेनाया गोली छातिइ फयेगु लिङ्देनया ख्याच्वः
सक्रिय चुनाव बहिष्कारया घोषणा याःगु स्वीस्वंगू दलीय मोर्चाय् आबद्ध संघीय लिम्बुवान राज्य परिषद्या नायः कुमार लिङ्देनं निर्वाचनय् सेना परिचालन याःगुलिइ च्यूताः प्वंकादिसें सेनाया गोली छातिइ फयेत तयार दुगु धयादीगु खः ।
चुनावया सुरक्षाया नितिं नेपाली सेना परिचालन याःगुया कन्हय् खुन्हु हे थौं लिङ्देनं प्रेस वक्तव्यपाखें थज्याःगु खँ न्ह्यःथनादीगु खः ।
लिङ्देनपाखें पिकाःगु वक्तव्यय् थुकथं न्ह्यःथनातःगु दु – ‘नेपाःयात ल्यंकेत संघीय सहअस्तित्ववादी बिचार धारा व फुक्क दलं ब्वति कायेकेगु नितिं चैत्रय् चुनाव याये धइगु सः थ्वयेका हे सेना, सशस्त्र प्रहरीया गोली नयेमाःगु खःसा उगु गोलीत छातिइ फयेकत व गोली, बारुदयात फायाः गुंगू जिल्ला लिम्बुवानया आन्दोलनयात अझ च्वये थकया न्ह्यःने न्ह्याकेत न्ह्याबलें तत्पर दुगु घोषणा यानाच्वना ।’ लिङ्देनं मंसिर ४ गतेया चुनाव सक्रिय रुपं बहिस्कार यायेगु जानकारी बियादीगु खः ।
