निर्वाचनय् ग्वाहालि यायेत नागरिकतय्त इनाप
राष्ट्रपति डा.रामवरण यादवं आसन्न संविधानसभा निर्वाचनय् ग्वाहालि यायेत फुक्क नागरिकतय्त इनाप यानादीगु दु । गैरआवासीय नेपाःमिपिनिगु खुक्वःगु विश्व सम्मेलन थौं येँय् उलेज्या यानादिसें राष्ट्रपति यादवं देशय् स्थायीत्वया नितिं निर्वाचन छगूयां छगू जक विकल्प जूगु धयादीगु दु ।
वय्कलं निश्पक्ष व स्वतन्त्र निर्वाचनया नितिं थःम्हं फक्व कुतः यायेगु धयादिसें आःया निर्वाचनपाखें संविधान दयेकीगुलिइ थः विश्वस्त दुगु नापं धयादीगु दु । देय्या संविधान दयेकेधुंकाः लगानीया लकस नं सुनिश्चित जुइगु धयादिसें राष्ट्रपति यादवं अथे मजूत्तले लगानीया नं छु नं अर्थ मदइगु धयादीगु दु ।
राष्ट्रपति यादवं एनआरएनतय्सं नेपालय् अप्वयेकूगु लगानी व मातृभूमिप्रतिया चिउताःया सम्मान यानादिसें थःगु पहिचानलिसे स्वानाच्वंगु नेपाःया समृद्धियात न्हापांगु शर्त दयेकेत इनाप यानादीगु खः ।
थ्वहे दथुइ संस्था नीस्वंगु झिदँलिपा एनआरएन, नेपालय् वैधानिक रुपं दर्ता जूगु दु । न्ह्यानाच्वंगु सम्मेलनय् परराष्ट्रमन्त्री माधवप्रसाद घिमिरें एनआरएनया नेतृत्वयात दर्ताया प्रमाणपत्र लःल्हानादीगु खः । प्रमाणपत्र लःल्हानादिसें मन्त्री घिमिरें एनआरएन दर्ता जूगु न्ह्यःथनादिसें एनआरएनतय्त नेपाः विकासया मेरुदण्डया रुपं काःगु धयादीगु खः ।
