निर्वाचनय् सेना परिचालन यायेगु ल्वापु ब्वलनेगु खः

सुरक्षा मामिलाया जानकारतय्सं मंसिर ४ गते जुइगु संविधानसभा चुनावय् सेना परिचालन यायेगुलिं देशय् झन् ल्वापु ब्वलंकेफुगु न्ह्यःथंगु दु ।

थौं येँया सम्वाद दबुलिइ ग्वसाः ग्वmगु ज्याझ्वलय् सैन्यविद् डा.इन्द्रजित राईं हथासं याःगु सेना परिचालनयात मन्त्रीपरिषद्या नायः खिलराज रेग्मी लिसे राष्ट्रपति डा.रामवरण यादवं नं पनेमफइगु धयादीगु दु । वय्कलं पूर्ण शक्ति ज्वना सेना परिचान याःगुलिं आः राष्ट्रया नेतृत्व प्रधानसेनापति गौरब शमशेर राणां याःगु धयादीगु दु ।

फुक्क ज्या मू प्यंगू दलया नेता व सरकारं सेनादथुइ लःल्हाःगुलिं सेनां उगु अधिकार छ्यलिगु वय्कःया धापू खः । वय्कलं निर्वाचनय् सेना परिचालन याकीगु दलतय्सं थुकिया गम्भीर लिच्वः थःम्हं हे फयेमालिगु धयादीगु दु । अवैधानिक सरकारं याःगु फुक्क ज्या अवैध जुइगु धयादिसें सैन्यविद् राईं चुनाव जूसां नं संविधान दयेके मफइगु धयादीगु दु ।

ज्याझ्वलय् द्वन्द्वविद् डा.विष्णुराज उप्रेतीं सेना परिचालन जुइधुंकूगु अवस्थाय् थुकिं जनताया दथुइ ग्याःचिकु अप्वयेकीगुया नापनापं ल्वापु अझ तच्वयेफुगु शंका यानादीगु दु । थज्याःगु अवस्थां देय् झन् ल्वापुइ लाइगु चिउताः अप्वःगु धयादिसें उप्रेतीं सेना परिचालनं दीर्घकालिन लिच्वः लाकीगु धयादीगु दु । वर्तमान अवस्थाय् सेना परिचालन यानाः न्ह्यात्थे याना नं संविधानसभा निर्वाचन दयेकेत स्वःगु इलय् थुकिं नागरिकं ययेकूगु थेंज्याःगु संविधान दयेके मफइगु वय्कःया धापू खः ।

अथेहे नेपाली सेनाया पूर्व उपरथी अनन्तबहादुर थेवें सेना परिचालन वैधानिक ढंगं जूगुलिं च्यूताः कायेम्वाःगु धयादीगु दु । वय्कलं सेनां चुनाव जुइगु लकसयात ग्वाहालि जक यायेगु धयादीगु दु । सेना परिचालन यानाः निर्वाचन याःसां नं थुकिं संविधान दयेके मफइगु वय्कलं शंका यानादीगु दु । सेना याकःचां छु नं यायेमफइगु धयादिसें वय्कलं सेनायात आम जनताया ग्वाहालि अपरिहार्य जूगु धयादीगु दु ।