राष्ट्रिय न्हूदँ समारोह समिति ११३४ नीस्वन
नेपाःया राष्ट्रिय संवत् नेपाल संवत् ११३४ न्हूदँ हनेगु निंतिं नागरिक स्तरपाखें नेपाल संवत् राष्ट्रिय न्हूदँ समारोह समिति ११३४ नीस्वंगु दु ।
नेपाल संवत् राष्ट्रिय न्हूदँ समारोह समिति ११३३या नायः इ. मोहनकृष्ण डंगोलया सभापतित्वय् जूगु उगु ज्याझ्वलय् ज्यापु महागुथि, केन्द्रीय मानन्धर संघ, राजोपाध्याय समाज, द्यःला समाज, कपाली समाज, स्यस्यः समाज, बज्राचार्य संरक्षण गुथि, दि शाक्य फाउण्डेशन, यूवा बौद्ध समूह, धर्मोदय सभा, तण्डुकार समाज, नेवाः जागरण मञ्च, नेवाः देय् गुथि नेपालमण्डल लगायत राजनीतिक पार्टीया नेवाः भातृसंगठनया प्रतिनिधिसहित १०८ जवान दुजः दुगु समारोह समिति नीस्वंगु दु ।
समारोह समितिका दुजः सुजीब बज्राचार्यं ११३४ न्हूदँ समारोह समिति संस्थागतरुपं नीस्वनेगु लगायत विषयया प्रस्ताव तयादीगु खः । उगु प्रस्तावय् थीथी भाषिक संस्था, जातीय संगठनत नाप आबद्ध दुगु, स्वतन्त्र रुपं क्रियाशील व्यक्तितय्त आबद्ध यायेगु, राजनीतिक पार्टीया नेवाः भातृ संगठनयात आबद्ध यायेगु, मिसा प्रतिनिधि ३३ प्रतिशत आबद्ध यायेगु, थीथी जातीय समुदाययात आबद्ध यायेगु खँ दुथ्याकातःगु दु । उगु प्रस्तावयात सर्वसम्मतिं पारित याःगु खः ।
समारोह समितिया याकन च्वनीगु मुँज्यां ११३४ न्हूदँ समारोह समितिया नायः ल्यइगु व ज्या भालाः क्वःछिइगु जूगु दु ।
