मन्त्री निसें नेतातक्क भारतीय गाडीइ
आसन्न निक्वःगु संविधानसभा निर्वाचन भारतीय डिजाईनय् जुइत्यंगु न्ह्यःथना बिरोध जुयाच्वंगु इलय् चुनावय् उम्मेदवारी दर्ता निसें प्रचार प्रसारय् नापं भारतीय नम्बर प्लेटया गाडीत छ्यलाः वयाच्वंगु दु ।
छु नं इलय् आपालं राष्ट्रवादया खँल्हाना भारतया बिरोध यानादीम्ह पूर्व प्रधानमन्त्री लिसे एकीकृत माओवादीया नेता डा. बाबुराम भट्टराई लगायत मेमेपिं आपालं नेतातय्सं उम्मेदवारी दर्ता यायेत नापं भारतीय गाडी हे छ्यःगु खः । आः बाबुराम सरकारया हे पूर्व मन्त्रीपिं निर्वाचन आचार संहिता अःखः चुनाव प्रचारय् प्रहरीया हे ग्वाहालिइ भारतीय नम्बर प्लेटया गाडीत निर्बाध रुपं छ्यलाः वयाच्वंगु दु ।
भारतीय गाडी छ्यलाच्वंपिं फोरम लोकतान्त्रिकया केन्द्रीय न्वकु लिसे पूर्व बालबालिका लिसे महिला मन्त्री दानबहादुर चौधरी व तमलोपाया केन्द्रीय दुजः लिसे पूर्व भौतिक योजनामन्त्री ईश्वर दयाल मिश्र लगायतपिं दु । निम्हं बाबुराम सरकारया मन्त्रीपिं खः ।
अथेहे फोरम नेपालया केन्द्रीय दुजः लिसे पूर्व सभासद् अभिषेक प्रताव शाहं नं चुनाव प्रचारय् भारतीय गाडी छ्यःगु दुसा कांग्रेस उम्मेदवार लिसे पूर्व राज्यमन्त्री बीरेन्द्र कनोडियाया नेता कार्यकर्ता नापं भारतीय गाडी छ्यलाः चुनावी प्रचार प्रसारय् दुगु खः ।
थ्वहे दथुइ, नेकपा–माओवादी नेतृत्वया मोर्चां चुनाव प्रचारय् भारतीय गाडी छ्यःगुप्रति बिरोध याःगु दु । मोर्चां चुनाव प्रचारय् भारतीय गाडी मछ्यलेत इनाप यानाः नापं प्रहरीया संलग्नताय् पूर्वमन्त्री निसें दलया नेता कार्यकर्तां तक्कं भारतीय गाडी हे छ्यःगु न्ह्यःथना धनगढीइ निगः गाडी तोडफोड याःगु दु ।
