थुगुसी नं तःजिक हन सिक्किमय् येँया:

हलिमय् नां जाःगु बिस्कं महत्वं जाःगु नेवाःतय्‌गु ज्वः मदुगु छगू तजिलजि म्वाःम्ह मनूयात द्यः भाःपाः न्यायेकीगु जात्रा येँयाः (कुमारीयात खतय् तयाः याइगु जात्रा) थुगुसी नं जःलाखःला देय् भारतया सिक्किमय् तःजिक हन ।

सन २००० निसें नामथाङ्गं शुरु जूगु थुगु कुमारी जात्रा 'येँयाः' सन् २००९ तक नामथाङ्ग, तुरुङ्ग आदि थासय् जक सिमित याना न्ह्याकाच्वंगु खः । सन् २०१० निसें धाःसा राजधानी ग्यान्तोक हे न्ह्याकूगु खः। वंगु दँनिसें थुगु कुमारी जात्रा 'येँयाः' खुन्हु सरकारी विदा समेत ब्यूगु खः ।

थुगुसी नं बुधवाः येँया कुमरीया किपायात रयालीसहित नगर परिक्रमा याःगु खःसा वयांलिपा नेवाः भ्वय् नकूगु खः ।

नेवाः न्ह्यलुवापिंत सिक्किमय् हन
दँय्दसं थें कुमारी जात्राखुन्हु येँय् नं विशिष्ट व्यक्तिपिं झायादीगु खःसा थुगुसी अन झायादीपिं नेपाःया विशिष्ट व्यक्तिपिंत छगू ज्याझ्वलय् हंगु दु ।

कुमारी जात्रा सिधय्वं जूगु उगु ज्याझ्वलय् सिक्किम राज्यया मूख्यमन्त्री सम्माननीय डा.पवन चाम्लिङ्गं नेपालं झायादीपिं नेवाः देय् दबूया नायः नरेश ताम्रकार, ख्यालिगुलु गुथिया नायः लिसें मध्यपुर कला परिषद्या को–अर्डिनेटर गणेशराम लाछि, नेवाः तजिलजि दबू, पोखराया नायः विष्णु शंकर ख्वाउँजु, नेपालभाषा मिसा खलःया संस्थापक, संस्कृतिविद् उप–प्राध्यापक चुन्दा बज्राचार्य, इटहरी नेवाः पुचःया नायः सोमबहादुर श्रेष्ठयात दोसल्लां न्ययेका हनादीगु खः ।

सफू विमोचन
विनायक शिक्षा निकेतन ईङ्गलिस स्कूल, थिमिया वहदँया लसताय् पिथंगु संस्कृतिविद् गणेशराम लाछिं च्वयादीगु कविता संग्रह ''भत्किएका सपनाहरु'' मूपाहाँ सम्माननीय डा. पवन चाम्लिङ्गं विमोचन यानादीगु खः । ज्याझ्वलय् मूपाहाँयात नं सिक्किम नेवाः गुथिं फेत्तां चिकूगु खःसा गुथिं पिथंगु ''कुमारी स्मारिका''या नं विमोचन यानादीगु खः ।

मूपाहाँ चाम्लिङ्गयात संस्कृतिविद् गणेशराम लाछिं एखादलू लःल्हानादीगु खः । नेपालं झायादीपिं शुक्रवाः येँय् लिथ्यंगु दु ।

News Location:

Related Stories

सिक्किमय् येँयाःयात सरकारी मान्यता