नेवाः गुथी तोखाया स्वक्वःगु मुँज्या क्वचाल
नेवाः गुथी तोखाया स्वक्वःगु मुँज्या तोखाया ऐतिहासिक पवित्र तीर्थस्थल सपनद्यः थाय् शनीवाः क्वचाःगु दु ।
ज्याझ्वलया मुपाहाँ, नेवाः देय् दबूया नायः भाजु नरेश ताम्राकारं वंइगु संविधान सभां नेवाः लागा, भासा व पहिचानया विषयस गुकथंया लिच्वः लाइ धाइगु खँय् वृहत सहलह न्ह्यकेमाःगु खँ कनादिल । अथेहे उगु ज्याझ्वलय् ने. सं. ११२९ निसें ११३३ दँ तक जुगू आर्थिक प्रतिवेदनज दाभरि भाजु हेराकाजी डंगोल पाखें व गुथीया प्रतिवेदज नायः भाजु गणेशमान श्रेष्ठं पाखें ब्वना न्येंकुगु ख: । अथेहे तोखाय् सक्रिय जुयाच्वंगु संघ, संस्था, खलः पुचः व क्लबया प्रतिनिधित्व कथं न्ह्यावनेगु निंतिं थुगू दँ निसें खलः पुचःयात नं दुथ्याकेगु ज्या जुगू खः ।
मुँज्यां भाजु गणेशमान श्रेष्ठया नायसुई १७म्ह दुजः दुगू ज्यासना पुचः पलिस्था याःगु खः । न्हूँगु ज्यासना पुचःया न्वकू भाजु माईला डंगोल छ्याञ्जे भाजु सत्यनारायण डंगोल ल्यू छ्याञ्जे भाजु शैलेन्द्र डंगोल दाभरि भाजु हेराकाजी डंगोल व ल्यू दाभरि सुलोना मानन्धर च्वनादिगु दु । अथेहे दुजः कथं धनवीर लवत, रामकृष्ण डंगोल, सुर्यमान डंगोल, हरिबहादुर डंगोल, विक्रम श्रेष्ठ, सानुमाया श्रेष्ठ, पुनमाया श्रेष्ठ, संगिता डंगोल, व हेमराज श्रेष्ठ च्वनादिगु दु ।
लुमके बह जू, तोखा नेवाः गुथीं तोखाया नेवाःतय्गु सामाजिक, साँस्कृतिक, भाषिक, हक हित अधिकार नापं नेवाः अस्तित्वया व उत्थानया निंतिं न्ह्यावयाच्वंगु थुगू नेवाः गुथी तोखां भासा, साहित्य, कला संस्कृति म्वाका तयेत तीब बिया वयाच्वंगु दु ।
