पर्वतय् न्हानाच्वंगु नेपालभाषा कक्षा (यात्रा संस्मरण)
कृष्ण प्रजापति
नेवाः देय् दबूपाखें थीथी जिल्लाय् नेवाः समुदाययात नेपालभाषा व नेपाल लिपि स्यनेगु झ्वलय् जि वंगु भाद्र ८ गते येँय्नं पर्वतया थापाठाना गाविस थ्यंकाः ।
पश्चिमाञ्चलया हे सदरमुकाम कास्की जिल्लाया पोखरां अथेहे ५० किलोमिटरति तापागु थ्व थापाठाना गां न्हापा मुक्कं नेवाः समुदायया वसोवास दुगु थाय् खः । आः धाःसा नेवाः जातिया ल्याय्म्हत विदेशय् वनाः ज्या याःवनेगु नापं थीथी कारणं सदरमुकामपाखे बिस्तापित जुजुं वनाच्वंगुलिं थन म्हो हे जक नेवाः समुदाय दु । नां थापाठाना जूसां थन आः नं अप्वः नेवाःतय् हे जक बसोबास दु । छगू इलय् थन नेवाःत नेवाः भाय् ल्हाये सःगु खःसां न्हूगु पुस्तां कुतः मयाःगुलिं आः धाःसा नेवाः भाय् ल्हाइपिं शुन्य थें जुयाच्वंगु दु । ल्हाये सःपिं बुराबुरीतय्सं नं थःपिनि भाय् मल्हाः ।
भाषा कक्षा कायेत येँय्नं याकचा माइक्रो बसय् च्वनाः पोखरा पृथ्वी चोक थ्यंकाः नेवाः देय् दबूया नायः नरेश ताम्राकारयात स्वापू तयाबलय् वय्कः अन हे च्वंगु राधाकृष्ण त्वालय् जुयाच्वंगु सापारु महोत्सवय् पाहाँ कथं झायाच्वनादीगु सिइदत । जित नापलायेत धाःसा थापाठाना गाविसया हे नेवार गुथिया नायः अशोककुमार श्रेष्ठ अन थ्यंकाझाल । वय्कः नापं जि राधाकृष्ण त्वालय् थ्यंकाः अनं नायः नरेश ताम्रकार व महासचिव रजनि मिलायात नापालानाः जिं ओखढुंगाय् च्वनागु इलय् अनं पिथनागु नुगः दुनेया मि नांगु लघु उपन्यास छगू छगू दोहलपा बिया । अनं जिपिं थापाठानाया लागिं मेगु गाडीं वनाः । केन्द्रीय अध्यक्ष नरेश ताम्रकारयाय् जनजाति महासंघय् जरुरी मिटिंग लानाः भाषा कक्षाया उलेज्याय् थ्यंके मफुत ।
थः हे प्रशिक्षक जुयाः थःहे मूपाहां कथं जिं कक्षाया उलेज्या याये धुंकाः थनया चण्डेश्वरी व थापाठाना मावि यानाः निथाय् निगू हे इलय् कक्षा चले जुयाच्वंगु दु । छगू छगू कक्षाय् पीम्ह न्यय्म्हति प्रशिक्षार्थीत वयाच्वंगु दु । ख्वपया हे कालिगढत थन वयाः दयेकूगु न्ह्यइपुगु देगः चण्डेश्वरी देगः नापं दयेकातःगु सतलय् सुथय् ७ बजेनिसें ८ः३० बजेतक कक्षा न्ह्याइ । अन स्कूल ब्वनीपिं विद्यार्थीत अप्वः वयेगु यानाच्वंगु दु । जि थः हे च्वनागु अशोककुमारया काय् दिपेश व म्ह्याय् दीपशिखां जित चिया हे त्वने मलाकं वनेनु कि वनेनु धकाः पिउ वयाच्वनी । उकिं नं उपिं भाषा प्रति गुलि अनुरागी खः धइगु क्यं । जित हे ब्वना यंकूम्ह अशोककुमारं धाःसा छुं ई लिपा कक्षा काये खनाच्वंगु मदु । समाजसेवा व थःगु निजी व्यवसायय् व्यस्त जुयाः गब्लें कुश्मा गब्लें पोखरा थ्यनाच्वनीम्ह वय्कलं मेमेगु संस्थाय् नं ई बियेमाःगु जुयाः जिनापं ब्वने धाःसा खनाच्वंगु मदु ।
अथे खःसां थः भौ रेखा श्रेष्ठ मानन्धरयात व म्ह्याय्चापिं दृष्टि व प्रतिक्षायात नं नियमित कक्षाय् वनेत घ्वासा बियाच्वंगु दु । सुथय् बविता, रविना, अप्सरा, अन्जन, निर्मला, सुन्दर, अर्जुन, सजिना, अविरल, श्याम नापं आपालं नेवाः समुदायं वःपिं श्रेष्ठ थरी नेवाःतय् न्ह्यसः लिसः व सहलहं घौत्या ई वंगु चाइ हे मखु । खुल्ला सतलय् ह्वाइबोर्डया व्यवस्था यानाः कक्षा चले जुयाच्वंगु दु । अन गाविसया डेक्स हयाः सेवा प्रदान यानातःगु दुसां मेच मदुगुलिं थः थःगु छेँय्नं मुढा हयाः फ्यतुइगु यानाच्वंगु दु । उलेज्या नं थन हे जूगु जुयाः न्हापां थन हे जक कक्षा न्ह्यानाच्वंगु खःसा छवाः लिपानिसें जक थापाठाना माविइ बहनीया कक्षा चले जुयाच्वंगु दु । थापाठाना गाविस न्यंकंया ५० परिवारया सच्छिम्ह मनू सहभागी जुयाच्वंगु थुगु कक्षाया बहनीया कक्षाय् वइपिं बिक्रम, सुन्दर, दीपशिखा, शिक्षिका, अन्जन व वया थः निनिपिं नापनापं वयाः छेँय् नं नेवाः भाय् ल्हायेगु कुतः याइगु इलय् कक्षा कयागुया सन्तुष्टि हे मुगु जुयाच्वनी । स्कुलय् छुं जुयाः पुस्तकालयय् अलमल जुयाः वा मेगु ज्याय् तःक्यनाः स्कलय् लिबाइगु इलय् छेँय् हे लिहाँ मवंसें स्कुल डेसय् हे सनिलय् न्ह्याइगु नेपालभाषा कक्षाय् च्वनीपिं विद्यार्थीत नं दुगुलिं थ्व कक्षाय् थःपिं त्वफिइ धकाः विद्यार्थीत गुलि सम्बेदनशील जुयाच्वंगु दु धइगु क्यं । सनिवाः पतिकं गब्लें नेपालभाषां दयेकातःगु फिल्म स्वयेगु, गब्लें कुश्मा बजार व शंखर पोखरीया भ्रमण, अले गब्लें देउराली दाँदाँया भ्रमण यानाः नं विश्व बाल दिवसया लसता साहित्य गोष्ठी न्यायेकेगु, सिद्धिदास महाजुया बुदिं हनेगु थेंज्याःगु नियमित थप अतिरिक्त क्रियाकलापं नेपालभाषा कक्षा तसकं हे तालानाच्वंगु तायेकेमाः ।
News Location:
Related Stories
गैर नेवाः समुदायं न्ह्याकाच्वंगु लाखे प्याखं पश्चिमाञ्चलस्तरीय बृहत्त मिसा महोत्सव न्ह्यात आमलि पर्वतया म्हसीका नेवाः भाय् सम्वन्धी पर्वतया ९२ दँया सरस्वती श्रेष्ठया नुगः खँMore Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
