लोकंह्वाःम्ह म्ये हालामि फत्तेमान राजभण्डारी मन्त
"मर्न बरु गाह्रो हुन्न" थेन्याःगु लोकंव्हाःगु म्ये हालामि भाजु फत्तेमान राजभण्डारी ७७ दँया बैंशय् सोमवाः चान्हय् मन्त । 'मतिना सिमाचाय् छ गजल जि गजल ...', 'चलः चलः वनाच्वन थःम्हं छिना च्वनागु लँ' आदि बागू दर्जनं मल्याक नेपालभाषा म्ये हालादीम्ह भाजु राजभण्डारीयात स्वँया क्यान्सर ल्वचं कयाच्वंगु खः । वय्कःया ओम अस्पतालय् वासः जुयाच्वंगु खः ।
मदुम्ह वय्कया सीम्हयात चावहिलया ओम अस्पतालं पशुपतिया बृद्धाश्रमय् दुगु खालि थासय् तइगु धाःगु दु । मदुम्ह वय्कयात अन्तिम श्रद्धाञ्जली बीत संगीत ख्यःया आपालं मनूत् पशुपतिया बनकाली वयाच्वंगु दुसा अन अर्थमन्त्री शंकर कोइराला, वरिष्ट संगीतकार शम्भुजीत बाँस्कोटा, प्रमेध्वज प्रधान, यादव खरेल आदिपिं पशुपति बनकाली थ्यकं वने धुंकूगु दु ।
बिक्रम संवत् १९९३ मंसीर १३ गते जन्म जुयादीम्ह वय्कलं थ्यंमथ्यं प्यसलं मयाक म्येय् थःगु सः व लय् चिनादीगु दु । आः वय्कःयात मंगलवाः पशुपति आर्यघाटय् अन्तिम संस्कार जुयाच्वंगु दु । मदुम्ह राजभण्डारीया जहान, निम्ह काय् व छम्ह म्ह्याय् दी ।
वय्कः मदयेधुंकूसा वय्कःया ''यस्तो पनि हुँदो रहेछ ...'', ''सान्नानीको गालैमा कालो कोठी रैछ...'' लिसें ''रातो र चन्द्र सूर्य जङ्गी निशान हाम्रो...'' म्ये झीगु नुगलय् सदां थ्वयाच्वनी ।
