पर्वतय् नं नेपालभाषा प्रशिक्षण कक्षा न्ह्यात
कृष्ण प्रजापती
नेवाः देय् दबूपाखें देय्या थीथी जिल्लाय् नेपालभाषा प्रशिक्षण न्ह्याकेगु झ्वलय् धौलागिरी अञ्चल अर्न्तग पहाडी जिल्ला पर्वतय् नं नेपालभाषा व नेपाल लिपि कक्षा न्ह्यात । येँय् नं प्रशिक्षक कथं झाःम्ह कृष्ण प्रजापतिं ब्यानर चायेकाः उगु प्रशिक्षण कक्षाया उलेज्या यानादीगु खः । ज्याझ्वलय् वय्कलं भाषा, संस्कृति हे मनूया परिचय जूगु ल्याखं थः सु खः धइगु वाःचायेकेत नं भाषा तसकं आवश्यक चीज खः धयादिल ।
थापाठाना गाविसया सविच पर्ूण्ाबहादुर भण्डारीं पुलांगु संस्कृति व संस्कारयात जगर्ेना यायेगु निंतिं आत्मानिसें हे भाषा सयेकेगु ज्याय् लगे जुयाच्वनेमाःगु खँ कनादिल । वय्कलं भाषा राष्टया सम्पत्ति जूगुलिं उकियात लोप जुइगुलिं बचे यायेगु निंतिं स्थानीय निकायं ज्या यानावनेमाःगु खँ कनादिल ।
स्थानीय समाजसेवी थमानसिं थापां नेवाः संस्कृति संरक्षण यायेगु निंतिं स्थानीय नेवाःतय्सं समिति दयेकाः ज्या यनावनेमाःगु सुझाब बियादिल । नेवार गुथि थापाठानाया सल्लाहकार गंगानारायाण श्रेष्ठं भाषा संस्कृतिया संरक्षणं राष्टया उन्नति जुइगु खँ कनादिल । समाजसेवी खड्गनारायण श्रेष्ठं स्थानीय मौलिक संस्कृति संस्कारया संरक्षणया लागिं राजनीतिक दल व स्थानीय निकायं सकसितं ग्वाहालि यायेमाःगु खँ कनादिल ।
नेवाः गुथि थापाठानाया अध्यक्ष अशोककुमार श्रेष्ठया सभापतित्वय् जूगु नेपालभाषा प्रशिक्षण उलेज्याय् स्थानीय श्यामप्रसाद श्रेष्ठं लसकुस यानादीगु खः । स्थानीय जिथि मय्जु सरस्वती श्रेष्ठं त्वाः देवाय् मत च्याकाः न्ह्याकूगु कक्षा उलेज्या समारोहय् राजनीतिक पार्टी प्रतिनिधितय्सं नं भिन्तुना देछानादिल । प्रशिक्षणय् सुथय् व बहनी याना सच्छिम्ह स्थानीय मनूत सहभागी जुयाच्वंगु दु । प्रशिक्षण लच्छि तक न्ह्याइगु खँ ग्वसाखलकं धाःगु दु ।
