येंयाः जात्रायात कयाः सहलह

येंयाः जात्रायात गथे याना व्यवस्थित याय्गु धैगु बारे थौं कन्हय् व्यापकरुपं सहलहया ज्या न्ह्याकाच्वंगु दु । थुकिया हे झ्वलय् इन्द्र जात्रा व्यवस्थापन समिति, काठमाडौं महानगरपालिका, महानगरिय प्रहरी वृत जनसेवा लगायतपिन्सं थीथी सरोकार पक्षयात कःघाना सहलह व्याकेगु ज्या न्ह्याकूगु दु । थौं जनसंख्याया चाप स्वनिगलय् गाक्कं अप्पोया वयाः येंयाः जात्राय् आपराधिक ज्याखँत नं न्ह्याना वयाच्वंगु खँयात वाःचाय्का थुकथंया ज्या न्ह्याकेगु यानाहःगु खः । थुकथं सहलह व्याकेगु झ्वलय् भाद्र २१ गते छत्रपाती व महानगर पालिकाय् जूगु खःसा २३ गते जनसेवा विशाल बजारय् जूगु खः ।