बाराही समाजया दँमुज्या क्वचाल
भाषीक, संस्कृतिक व सामाजिक उत्थान यायेगु ताःतुना नीस्वगु बराही समाजया न्याक्वःगु दँमुज्या वंगु गुंलागा दशमी कुन्हु यलया यनामुगलय् क्वचाःगु दु ।
बाराही समाजया नायः भाजु रामकृष्ण बाराहीया नायसुई न्ह्याःगु उगु ज्याझ्वलय् बाराही समाजया छेँ द्येकेगु निंतिं दिलमाया बाराही व सुर्जदेवी बाराहीपाखें मंका कथं जग्गा बिया ग्वाहालि यानापिंत हनेगु ज्या यानाः दिगु खः । नापं बाराही दः गुथीपाखें १ लाख धेबाः ग्वाहालि व थीथी व्यक्तित्वपिंसं याःगु ग्वाहालि यानाः थ्यंमथ्यं ३५० लाख तक ग्वाहालि मुंकेत उगु दँमुज्या ताः लाःगु खः ।
नेवाः देय् दबूया नायः भाजु नरेश ताम्राकार मुपाहाँ कथं झायादिगु उगु ज्याझ्वलय् पाहाँ कथं सिल्पाकार समाजया नायः भाजु मोतीलाल सिल्पकार, ताम्राकार समाजया नायः भाजु अच्चुत कृष्ण ताम्राकार व सिकर्मी समाजया नायः भाजु सुरज स्थापित झायादिगु खः ।
दँमुज्यां भाजु रामकृष्ण बाराहीया नायसुई झिंस्वम्हया ज्यासना पुचः नीस्वनेगु ज्या नं जुगू खः । ज्यासना पुचलय् न्वकू भाजु पुष्परत्न बाराही, छ्यान्जे भाजु प्रेम कृष्ण बाराही दाँभरि भाजु दिल कुमार बाराही ल्यू छ्यान्जे भाजु फिरोज बाराही ल्यू दाँभरि मय्जु गँगा आरति बाराही व दुजःपिं भाजु शिवरत्न बाराही, भाजु दिमक बाराही, मय्जु गीता बाराही, मय्जु आरती बाराही, भाजु नरेश बाराही व मय्जु रमिता बाराही दुथ्यागु दु ।
लुमंके बह जू खँ बाराही समाज परापुर्वकालनिसें बुँगद्यः द्येकेगु ज्या यानाः वयाच्वंगु छगु नेवाः समूदायया अभिन्न अङ्ग खः ।
Related Stories
प्यंगु दः मंकाः समाजया तःमुँज्या क्वचाल
