जागरण मञ्चं “नेवाः प्रदेश प्रतिबद्धता अभियान” न्ह्याकीगु
नेवाः जागरण मञ्चं थौंया राजनीतिक स्थिती नेवाःतय्त आन्दोलित याना तयेत व नेवाः प्रदेश सुनिश्चित यायेत नेवाः प्रदेश प्रतिबद्धता अभियान न्ह्याकेगु निर्णय याःगु दु । बुधवाः मञ्चया नायः सुजीव बज्राचार्यया सभापतित्वय् जूगु उगु मुँज्यां नेवाः प्रदेश प्रतिबद्धता अभियानकथं थीथी ज्याझ्वः न्ह्याका यंकेगु क्वःछ्यूगु दु ।
उगु समितिं याकनं हे प्रतिबद्धता अभियानया ज्याझ्वः पितबीगु निर्णय याःगु दु ।
अथेहे मुँज्यां भिक्षुणी धम्मवती गुरुमांयात हना व मञ्चया न्याक्वःगु बुदिं थ्वहे वइगु आश्विन १२ गते यायेगु क्वःछ्यूगु दु । हना ज्याझ्वलय् पितब्वयेगु कथं भिक्षुणी धम्मवती गुरुमांया जीवनीयात कयाः बर्मेली भिक्षु र वे थ्वं महास्थवीरं च्वयादीगु व भिक्षु ञानपुण्णिकं नेपालभाषां भाय्हिलादीगु सफू “यःम्ह म्ह्याय्”या निगूगु संस्करण तयार जूगु दु ।
मञ्चं सक्रिय सदस्यता नं इनेगु निर्णय याःगु दुसा थुकिया निंतिं सदस्यपिं बालकृष्ण खड्गी व ईश्वरमान डंगोल दुथ्याःगु समिति नीस्वंगु दु ।
अथेहे जागरण मञ्चया पहलय् जूगु रामशेखर हना ज्याझ्वःयात कयाः समीक्षा जूगु दुसा निरन्तररुपं नेवाः कलाकारतय्त सम्मान यायेगु खँय् सहलह नं जूगु दु ।
