पोखराय् क्वाति महोत्सव जुइगु

नेवाःतय् विशेष नसा मध्येया छता नसा क्वाति नं खः । दच्छिइ प्यकः विशेष न्हि खुन्हु दयेका नइगु (बैशाख १ गते खाइसँल्हू खुन्हु, गुंलाथ्व पुन्ही खुन्हु, जुगःचःह्रे खुन्हु व माघ १ गते घ्यःचाकु सँल्हू खुन्हु) थुगु क्वातिया बारे अझ अप्वः प्रचार यायेया लागि पोखराय क्वाति महोत्सव याइगु जूगु दु ।

मिस नेवाः पोखरा पुचःया कजिसुइ जुइगु थुगु क्वाति महोत्सव थ्वहे वइगु नेपाल संवत् ११३३ गुंलागा चौथि (२०१३ अगष्ट २४) खुन्हु याइगु खः । सुथसिया ७:३० ताःइलंनिसें १० ताः ईतक नेवाः छेँ, भिमसेन टोल, पोखराय् न्ह्याइगु थुगु क्वाती महोत्सवय् ब्वतिकयादीत थुगुसीया मिस नेवाः पोखरा मय्जु सुमना वज्राचार्यं इनाप यानादिसें कार्ड नं इना बियातःगु दु ।