इजिप्टय् लच्छिया नितिं आपतकालिन घोषणा

इजिप्टय् सुरक्षायात ध्यानय् तयाः लच्छिया नितिं संकटकालया घोषणा याःगु दु । इजिप्टय् लच्छितकया नितिं राष्ट्रपति ज्याकुथियात उद्घत यासें बिबिसीं न्ह्यथंगु दु ।

थ्वहे झ्वलय् इजिप्टया पुलांम्ह राष्ट्रपति मोहम्मद मोर्सीया समर्थनय् प्रदर्शन यानाच्वंपिं प्रदर्शनकारीतय्त सुरक्षाकःमितसें याःगु कारवाही लानाः २३ म्ह सीगु दु । मोर्सीया पार्टी मुस्लिम ब्रदरहुडया कार्यकर्तातसें राजधानी कायरोय् थी थी शिविरया स्थापना यानाः बिरोधयात निरन्तरता बियाच्वंगु खःसा शिविर चीकेगु नितिं सुरक्षा निकायं बिउगु उजं हाचांगाःगु धासें सुरक्षाकःमिं अश्रुग्याँस छ्यलाः मनूत चीकेत स्वःगु खः । थ्वहे झ्वलय् ब्रदरहुदया कार्यकर्ता व वर्तमान सरकारया समर्थकत दथुइ ल्वापू जूगु खः । उगु ल्वापुइ आपालं मनूत घाःपाः जूगु धाःगु दु ।

इजिप्टय् वंगु जुलाइ ३ तारिखय् अनया सैनिकं पुलांम्ह राष्ट्रपति मोर्सीयात अपदस्थ याःगु खःसा मोर्सीयात त्वःतेत माग यासें वंगु जुलाइ ३ तारिखनिसें हे प्रदर्शन यानावयाच्वंगु खः । उगु प्रदर्शनय् निसः त्या स्वयां अप्वः मनूत सीधुंकूगु दु ।

वंगु वालय् जक संयुक्त राष्ट्र संघया मूछ्याञ्जे बान कि मुनं पुलांम्ह राष्ट्रपतियात त्वःतेत व वार्ताया माध्यमपाखें प्रजातन्त्रया बहालिया नितिं न्ह्यज्यायेत इनाप यानादीगु खः ।

More Stories Like this