माओवादीया विरोध बाबजूद नं अनुसन्धान न्ह्याकीगु
अपहरण लिपा चितवनय् स्याःम्ह गोरखाया कृष्ण प्रसाद अधिकारीया मुद्दाया अनुसन्धान न्ह्याकीगु जूगु दु । हत्याया अनुसन्धान मयायेत एकीकृत नेकपा माओवादीं तसकं दबाब बिउसां नं प्रहरीं अनुसन्धानया ज्या न्ह्याकेत्यंगु खः ।
राष्ट्रिय मानव अधिकार आयोगया विरोध लिपा सरकारया निर्देशनय् प्रहरी प्रधान ज्याकुथिं हाकनं अनुसन्धानया नितिं जिल्ला प्रहरी ज्याकुथिइ पत्राचार याःगु दु ।
वि.सं. २०६१ जेष्ठ २४ गते तत्कालिन नेकपा माओवादीं थःथिति नापलायेत चितवन वनेगु झ्वलय् अपहरित जूम्ह अधिकारीयात चितवनया रत्ननगर १३ वडाय् स्याःगु खः । अधिकारीया हत्याया विषयस अनुसन्धान जुयाच्वंगु इलय् सरकारं द्वंदकालया घटनायात छानवीन यायेत सत्यनिरुपण नापं मेलमिलाप आयोग गठन यायेगु धासें मुद्दा स्थगित याःगु खः ।
