नेकपा-माओवादी चुनावय् वईगु संकेत
नेकपा-माओवादी लिसें ३३ गू दल चुनावय् वइगु सुनिश्चित जूसा मंसीर ४ गते क्वःछिनातःगु संविधानसभाया चुनाव लिछ्यायेत प्यंगू दल तयार जूगु दु ।
निर्वाचन प्रकृयायात कयाः असन्तुष्ट जुयाच्वंगु ३३ गू दललिसें बुधवाः जूगु वार्ताय् उच्चस्तरीय राजनीतिक समितिइ दुथ्याःगु प्यंगू दलया शीर्ष नेतातसें न्हूगु तिथिइ क्वःछीगु चुनावय् मोहन वैद्य माओवादी लिसेया दल निःशर्त ब्वतिकाइगु जूसा मंसीर ४ गतेया चुनाव लिछ्यायेफइगु धाःगु खः ।
न्हू बानेश्वरय् च्वंगु समितिया ज्याकुथिइ जूगु वार्ताय् ३३ गू दललिसे वार्ता प्रकृया न्ह्यःने यंकेगु नितिं मंसीर ४ गतेया चुनाव प्रकृया स्थगित यायेमाःगु माग याःगु खः ।
श्रोतया कथं मुँज्याया शुरुइ राजनीतिक समितिया संयोजक नापं एकीकृत नेकपा माओवादीया नायः पुष्पकमल दाहाल प्रचण्डं ३३ गू दलया अप्वः धैथें माग पूवंकेमफइगु धयादिसें सहमति जुइगु वा मजुइगु थौं हे क्वःछीमाःगु प्रस्ताव तयादीगु खःसा उगु प्रस्तावयात कयाः माओवादीया नायः वैद्य लिसेंया नेतातसें प्यंगू दल चुनावयात कयाः गम्भिर मजूगु द्वपं बिउगु खः ।
सहलहया झ्वलय् नेकपा-माओवादीया छ्याञ्जे देव गुरुंगं चुनाव स्थगित यायेगु माग यायेवं नेकपा एमालेया नायः झलनाथ खनालं तिथि लिछ्यायेवं चुनावय् ब्वति काइगु ग्यारेन्टीयात कयाः न्ह्यसः तयादीगु खः । उकिया लिसलय् मोर्चाया नेतातसें चुनावय् ब्वति कायेगु प्रतिबद्धताया प्रस्ताव न्ह्यब्वःगु खः ।
थ्वहे झ्वलय् प्यंगू दलया नेतातसें मंसीर ४ गते चुनाव लिछ्यायेगु खःसा मेगू चुनावय् निःशर्त ब्वति कायेमाःगु प्रस्ताव तःगु खः ।
प्यंगू दल व ३३ गू दलया थःथःगु अडान लिपा आन्तरिक सहलह यायेगु व वइगु शुक्रवाः हाकनं वार्ताय् च्वनेगु कथं वार्ता क्वचायेकूगु खः ।
