धर्मादित्यया बारे परिचयात्मक गोष्ठी जुल
नेपालभाषाया अग्रज साहित्यकार नापं न्हापांम्ह पत्रकार धर्मादित्य धर्माचार्यया विषयस शुक्रवाः येँया नेपाल प्रज्ञा प्रतिष्ठान, प्रज्ञा पुस्तकालय कक्षय छगू गोष्ठी जुल ।
नेपालभाषा प्रज्ञा प्रतिष्ठान, साहित्य (मातृभाषा) विभागया ग्वसालय् जूगु उगु ज्याझ्वलय् मूपाहां नापं नेपालभाषा एकेडमिया चान्सलर, संस्कृतविद् सत्यमोहन जोशीं गैर खसभाषीतसें नेपाली साहित्य थकायेगु नितिं यक्व योगदान ब्यूसां नं गैर खसभाषायात थकायेगु नितिं खास हे ज्या मजुयाच्वंगु खँय् असन्तुष्टि प्वंकादिल ।
नेपाल प्रज्ञा प्रतिष्ठानया उपकुलपति गंगा प्रसाद उप्रेतिया सभाध्यक्षताय् जूगु उगु ज्याझ्वलय् सभा नायः उप्रेतिं जनजातितसें थःथःगु पहिचानया विषयस खँ ल्ह्वनाच्वंगु थुगु इलय् नेपाःया थी थी जातिया भाषा व अग्रजपिनिगु बारे थुकथं गोष्ठी यानावनेमाःगु खँय् बः बियादिल । वय्कलं नेपालभाषाय् जक सीमित जुयाच्वंम्ह अग्रज धर्मादित्यया बारे गैर नेवाःतय्सं नं सीकेमाःगु व वय्कःपिनिगु योगदानयात लुमंकेमाःगु खँ धयादिल ।
ज्याझ्वलय् प्रा. प्रेमशान्ति तुलाधरं भाषा जवाः धर्मादित्यया बारे ज्यापौ न्ह्यब्वयादीगु खःसा उगु ज्यापौयात कयाः मांभाय् पुचःया सल्लाहकार नापं साहित्यकार डा. पुष्पराज राजकर्णिकारं टिप्पणी यानादीगु खः ।
साहित्या (मातृभाषा) विभागया संयोजक प्राज्ञ सुलोचना मानन्धरं ज्याझ्वलय् लसकुस यानादिसें धर्मादित्य धर्माचार्यया विषयस गोष्ठीया आवश्यकता व गुकथं ग्वसाः ग्वयेगु ज्या जुल धइगु खँय् ध्वाथुइकादिल ।
नेपालभाषाया नापं गैर नेपालभाषाया आपालं साहित्यकार व भाषा ह्यःमिपिनिगु उपस्थिति दुगु उगु ज्याझ्वलय् मांभाय् पुचःया नायः हेरारत्न शाक्यं धर्मादित्य धर्माचार्यया नापं पुचःपाखें यानावयाच्वंगु ज्याझ्वःया बारे कनादीगु खः । ज्याझ्वः मांभाय् पुचःया विशेष ग्वाहाली जूगु खः ।
