मनांग "किंगस कप"या फाइनलय्

भारतया सिक्किम युनाइटेडयात बुकूसें मनांग मर्स्यांदी क्लब भुटानय् न्ह्यानाच्वंगु "किंगस कप फुटबल"या फाइनलय् दुहांवंगु दु ।

विहिवाः जूगु न्हापांगु सेमीफाइनल कासाय् मनांगं भारतया पूर्व कप्तान भाइचुंग भुटियाया क्लबयात निगूया विरुद्ध खुगू गोलं बुकूसें उपाधि लिक्क थ्यंगु खः ।

कासाय् मनांगं २० गू सेकेण्डय् हे भीम दर्लामिया गोलपाखें अग्रता काःगु खः । न्हापांगु हाफया ४३ गू मिनेटय् सिक्किम युनाइटेड पेनाल्टीइ गोल यायेमफयेवं कासा बराबरी यायेगु ह्वःताः त्वःफिकूगु खः ।

न्हापांगु हाफय् १ गू गोलं न्ह्यःने लाःगु मनांगया नितिं कासाया ५१ गूगु मिनेटय् सुजल श्रेष्ठं गोल यानाः अग्रता निदुगं याःगु खः । थ्वहे झ्वलय् ६२ गूगु मिनेटय् सिक्किमया नितिं विजेन्द्रं गोल याःगु खःसा मनांगयात दबाबय् तःगु सिक्किमं ८३ गूगु मिनेटय् बराबरी गोल यायेगु ह्वःताः त्वःफिकल । क्वःछिनातःगु ९० गू मिनेटया अन्त्यपाखे सिक्किमं गोल यायेवं बराबरी जूगु कासा अतिरिक्त ईपाखे न्ह्याःवंगु खः ।

तर तंगु ३० गू मिनेट धाःसा पूवंक हे मनांगया पक्षय् वन । १०० गूगु मिनेटय् योना इलियासं मनांगया नितिं गोल याःगु खःसा सुलभ मास्कें १०७ गूगु मिनेटय् गोल यानाः मनांग निगू गोलं न्ह्यःने लात । ११० गूगु मिनेटय् ब्यक्तिगत निगूगु गोल याःगु योनां ११९ गूगु मिनेटय् ह्याट्रिक यायेवं मनांगं ६-२ या त:ब्यागु अन्तरं उगु कासा त्याकूसें उपाधि लिक्क थ्यंगु खः ।

थ्वस्वयां न्ह्यः २००४ य् किंगस कप फुटबलया फाइनलय् मनांग थाइल्याण्डया बीईसीलिसे बुनाः उपाधिपाखें बञ्चित जूगु खः ।

More Stories Like this