संघीय समाजवादीया राजनीतिक समितिलिसे न्यागू माग
चुनावया विपक्षय् दुगु अशोक राई नेतृत्वया संघीय समाजवादी पार्टीं उच्चस्तरीय राजनीतिक समितियात थःगु पुलांगु माग तयाः ५ गू बुँदाया प्रस्ताव तःगु दु ।
उच्चस्तरीय राजनीतिक समिति व समाजवादी पार्टी दथुइ न्हू बानेश्वरय् विहिवाः सुथय् जूगु सहलहस राई नेतृत्वया संघीय समाजवादीं समानुपातिक सिट ल्याः न्हापाया हे कायम यायेमाःगु, मन्त्रीपरिषदया नायःपाखें प्रधानन्यायाधीस पदपाखें राजीनाम बीमाःगु, जनसंख्याया लिधंसाय् निर्वाचन क्षेत्र कायम यायेमाःगु लिसेंया न्यागू बुँदाया माग न्ह्यःब्वःगु संघीय समाजवादीया मूछ्याञ्जे राजेन्द्र श्रेष्ठं जानकारी बियादीगु दु ।
नेता श्रेष्ठं थःपिन्सं न्ह्यब्वयागु न्यागू बुँदाया माग सम्बोधन मजूसा चुनावय् मवनीगु व सहमति नं मजुइगु धयादीगु दु । वय्कलं समितिया संयोजक पुष्पकमल दाहाल प्रचण्डं समिती सहलह यानाः निष्कर्ष थ्यंकेगु धयादीगु नं जानकारी बियादिल । समितिया मुँज्या लिपा हाकनं वार्ता जुइगु नं मूछ्याञ्जे श्रेष्ठं धयादीगु दु ।
थ्वहे झ्वलय् एकीकृत नेकपा माओवादीया नेता नारायणकाजी श्रेष्ठं समाजवादी पार्टीं न्ह्यब्वःगु मागयात कयाः अन्तरपार्टीइ सहलह यानाः मंकाः धारणा दयेकेधुंकाः शनिवाः निर्णायक वार्ता जुइगु धयादीगु दु । वय्कलं समाजवादी पार्टी तःगु खँयात थःपिन्सं गम्भिर कथं कयागु व थुगु विषयस समितिइ सहलह जुइगु धयादिसें वार्ता 'सकारात्मक' जूगु टिप्पणी यानादिल ।
नेता श्रेष्ठं मंसीर ४ गते चुनावय् ब्वति कायेगु सुनिश्चित जूसा समानुपातिकया सिट अप्वयेकेगु, समतिया विस्तार वा खारेजी यायेफइगु नपां मन्त्रीपरिषदया तकं विस्तार यायेफइगु लिसेंया खँय् थःपिं तसकं क्वमिलु जुइफइगु धयादिसें क्वमिलु जुयाः वयेत नं इनाप यानादिल ।
वार्ताय् उच्चस्तरीय राजनीतिक समितिया संयोजक नापं एकीकृत नेकपा माओवादीया नायः पुष्पकमल दाहाल प्रचण्ड, नेता नारायणकाजी श्रेष्ठ, डा. बाबुराम भट्टराई, नेपाली कांग्रेसया कार्यवाहक सभापाति रामचन्द्र पौडेल, नेता डा. रामशरण महत, मिनेन्द्र रिजाल नापं नेकपा एमालेया न्वकू बामदेव गौतम व रघुजी पन्त लिसेंया नेतापिनिगु ब्वति दुगु खः ।
थ्वस्वयां न्ह्यः समितिं नेकपा माओवादी नेतृत्वय् दुगु ३३ गू दलीय मोर्चा व उपेन्द्र यादा नेतृत्वया मार्चालिसे अलग्ग अलग्ग हे वार्ता याःगु खः ।
