वैद्यया मागकथं सरकारं पौ छ्वल
सरकारं नेकपा माओवादी नेतृत्वया ३३ गू दलीय मोर्चायात वार्ताय् वयेत आह्वान यासे हाकनं मेगू पौ छ्वःगु दु ।
३३ गू दलीय मोर्चां सरकारं थःपिनिगु अस्तित्व स्वीकार मयाःगु धासें असन्तुष्टि प्वंकेवं सरकारं हाकनं माग कथंया भाषा तयाः पौ छ्वःगु खः । सरकारं थ्वस्वयां न्ह्यः छ्वःगु पतिइ ३३ गू दलीय मोर्चा धकाः चर्चाय् वःगु धकाः न्ह्यथनातःगु खः ।
मन्त्रीपरिषदया विहिवाः च्वंगु मुँज्यां मोर्चायात पौ छ्वयेगु क्वःछिउगु खः । देशया समस्या वार्ता, सम्वाद व सहलहपाखें ज्यनीगु खँय् नेपाल सरकार विश्वस्त जूगुलिं नेकपा माओवादी व उगु पार्टी सम्बद्ध ३३ गू दलीय मोर्चायात वार्ताया नितिं हाकनं ब्वनातःगु मुँज्यालिपा छ्वःगु पतिइ न्ह्यथनातःगु दु । वार्ता यायेगु नितिं थाय्, तिथि व ई निगू पक्षया सहमतिपाखे क्वःछीफइगु नं न्हय्यथनातःगु उगु पतिइ सरकारी वार्ता पुचःया संयोजक नापं गृहमन्त्री माधवप्रसाद घिमिरें ल्हाःचिं तयातःगु दु ।
