अन्तराष्ट्रिय च्याम्पियन्स कप रियल मेड्रिडयात

इंग्लीस प्रीमियर क्लब चेल्सीयात बुकूसें स्पेनिस जायन्ट क्लब रियल मेड्रिडं 'अन्तराष्ट्रिय च्याम्पियनशीप कप' फुटबलया उपाधि त्याकूगु दु ।

बुधवाः चान्हय् अमेरिकाया मायामीइ च्वंगु सनलाइट रंगशालाय् जूगु फाइनल कासाय् रियल मेड्रिडं जोसे माउरिन्होया चेल्सीयात छगूया विरुद्ध स्वंगू गोलं बुकूसें उगु उपाधि त्याकूगु खः ।

उगु कासाय् नायक जूगु क्रिष्टियानो रोनाल्डों रियलया नितिं निगू गोल याःगु खःसा मेगु गोल मार्सेलों याःगु खः । कासाया १४ गूगु मिनेटय् मार्सेलों गोल यासें रियलयात न्ह्यःने लाकूगु खःसा उकिया निगू मिनेट लिपा हे चेल्सीया रामेरिजं गोल यासें कासा बराबरीइ हःगु खः ।

थ्वहे झ्वलय् कासाया ३१ गूगु मिनेटय् रोनाल्डों गोलयासें न्हापांगु हाफय् रियलयात छगूया विरुद्ध निगू गोलं न्ह्यःने लाकल । निगूगु हाफया ५६ गूगु मिनेटय् रियलया नितिं रोनाल्डों ब्यक्तिगत निगूगु गोल यात । चेल्सी विरुद्ध हावी जूगु उगु कासाय् मेगु गोल मजुइवं रियलं चेल्सीयात छगूया विरुद्ध स्वंगू गोलं बुकूसें उपाधिइ कब्जा याःगु खः ।

More Stories Like this