निर्वाचन आयोगपाखें च्यागू दल अस्वीकृत
निर्वाचन आयोगय् दल दर्ताया नितिं निवेदन बिउगु दलमध्ये च्यागू दल खारेजीइ लाःगु दु । नेपाल जनलोकतन्त्र पार्टी, नेपाल रिपब्लिक पार्टी, बहुजन समाज पार्टी, राष्ट्रिय जनकंग्रेस पार्टी, युवा महिला जनता पार्टी, युवा नेपाल पार्टी, राष्ट्रवादी युवा मोर्चा व स्वाभिमानी एकता समाजयात मान्यात मबीगु आयोगं क्वःछिउगु दु । उगु दलं अन्तरिम संविधान व संविधानसभा नियमावली न्ह्यथनातःगु शर्त पूमवंकूगुलिं मान्यता बीमफूगु आयोगं न्ह्यथंगु दु ।
आयोगया कथं मंसीरय् जुइगु संविधानसभाया चुनावया नितिं १२५ गू दलं ब्वति कायेदइगु जूगु दु । दल दर्ताया धलखय् नेकपा एमाले न्हापांगु थासय् लाःगु दुसा निगूगु थासय् नेपाली कंग्रेस, स्वंगूगु थासय् राष्ट्रिय प्रजातन्त्र पार्टी नेपाल, प्यंगूगु थासय् एकीकृत नेकपा माओवादी व न्यागूगु थासय् नेपाल मजदुर किसान पार्टी लानाच्वंगु दु । दक्कलय् लिपांगु थासय् चुरे भावर पार्टी लानाच्वंगु आयोगं न्ह्यथंगु दु ।
लुमंकेबहःजू दल दर्ताया झ्वलय् एकीकृत नेकपा माओवादी व नेकपा एमाले दथुइ सु न्हापा धइगु खँयात कयाः ल्वापू तकं जूगु खः ।
दल दर्ताया ई क्वचाःसां नं उच्चस्तरीय राजनीतिक समिति व असन्तुष्ट दल दथुइ जुयाच्वंगु वार्ता सहमती क्वचाःसा दलया ल्याः अप्वइगु पक्का दु ।
