विहिवाः निसें खाया ला न्याये दइगु
सरकारं खा, खाया ला नापं ख्येँय् न्यायेमीगु ज्याय् तःगु प्रतिबन्ध कन्हय् बिहिवाः निसें लागू जुइकथं खुल्ला याःगु दु । वर्ड फ्लू ब्यापक न्यनावनेवं नियन्त्रणया नितिं सरकारं खा, खाया ला व ख्येँय् न्यायेमीगु ज्याय् छवाःया नितिं प्रतिबन्ध तःगु खः ।
कन्हय् विहिवाः निसें प्राविधिकपाखें चेक जाँच यानाः कारोबार खुल्ला यायेगु क्वःछिउगु पशु सेवा विभागया प्रबक्ता नारायण घिमिरें जानकारी बियादीगु दु । येँया प्यंगू नाका नागढुंगा, सांगा, फम्पि व नागार्जुनय् सरकारी प्राविधिकं क्वारेन्टाइन चेक यानाः स्वस्थ खाया कारोवार याकेबीगु नं जानकारी नं प्रबक्ता घिमिरें बियादिल ।
ल्वचंकःपिं खात नष्ट यायेगु ज्याय् ताःलाःगु, वर्ड फ्लूया बारे जनचेतना अभिबृद्धि जूगु व व्यवसायीतसें ग्वहालि यायेगु प्रतिबद्धता प्वंकूगुलिं खा न्यायेमीगु ज्या खुल्ला याःगु विभागं न्ह्यथंगु दु ।
थ्वहे झ्वलय् संभावित जोखिमयात ध्यानय् तसें नाकाय् चेक जाँच व सरकारी निगरानी अप्वयेकेगु क्वःछिउगु नं प्रवक्ता घिमिरें जानकारी बियादिल ।
थ्वस्वयां न्ह्यः किसान व विक्रेतां सुचुकाः ल्वचंकःपिं खा न्यायेमीगु ज्या याःगुलिं ल्वय् न्यनावनेत ग्वहालि जूगु सरकारी अधिकारीतसें धयावयाच्वंगु खः ।
