धर्माचार्यया विषयस परिचयात्मक गोष्ठी जुइगु
नेपाल प्रज्ञा प्रतिष्ठान मातृभाषा विभागं नेपालभाषाया अग्रज साहित्यकार नापं न्हापांम्ह पत्रकार "धर्मादित्य धर्माचार्य"या विषयस परिचयात्मक गोष्ठी याइगु जूगु दु ।
मां भाय् पुचः, यलया विशेष ग्वाहाली थ्वहे वइगु साउन २५ गते, शुक्रवाः प्रतिष्ठानया प्रज्ञा-पुस्तकालयया कक्षय उगु गोष्ठी जुइत्यंगु खः ।
थःगु मांभाय् नेपालभाषाया विकास व उत्थानया नितिं थःगु जीवन समर्पित यानादीम्ह धर्मादित्य धर्माचार्ययात नेवाःतय्गु लागाय् उदाहरणीय व्यक्तित्वया कथं कायेगु याः । वय्कलं दक्कलय् न्हापां भारतया कलकत्तापाखें नेपालभाषाय् "बुद्ध धर्म" नांया पत्रिका पिथना पत्रकारीता न्ह्याकादीगु खःसा लिपा उगु पत्रिका "बुद्ध धर्म व नेपालभाषा"या नामं पिथंगु खः । अथेहे धर्मादित्य धर्माचार्यया कुतलय् कलकत्ताय् नीस्वंगु नेपालभाषा साहित्य मण्डल देशं पिने स्थापना जूगु नेपालभाषाया न्हापांगु संस्था खः ।
धर्मादित्य धर्माचार्यया लुमन्तिइ मां भाय् पुचलं यलया पूच्वय् धर्मादित्यया झ्वाता पलिस्था याःगु दुसा दँय्दसं धर्मादित्यया बुदिंया झ्वलय् स्मृति सभा यानावयाच्वंगु दु । अथेहे नेपालभाषाया पत्रकारीता ख्यलय् योगदान याना वयाच्वंम्ह छम्हेसित "धर्मादित्य धर्माचार्य सिरपाः" बियावयाच्वंगु दु ।
