थनिंनिसें गुंला पर्व शुरु

थौं ने.सं. ११३३ गुंलाथ्व पारु । थनिंनिसें गुंला पर्व शुरु ।

बौद्ध जगतय् तःजिकथं कयातःगु गुंलापर्व थौं निसें न्ह्याःगु दु । थुगु गुंला पर्वय् विशेष याना स्वय्म्भु महाचैत्यया दर्शन याः वनेगु चलन दु । गुंला लच्छियंकं बौद्धतसें महाचैत्य, चैत्य, चिभाःया नाप नापं बौद्ध स्थलया भ्रमण याना पुजाआजा याना वयाच्वंगु दु । गुंला पर्वय् विशेश याना थीथी बाहाः, त्वाःया गुंलाबाजं थानाः स्वय्म्भू वनेगु चलन दया वयाच्वंगु दु ।

अथेहे यल, ख्वपया बौद्ध धर्मावलम्बित थःत सतिगु चैत्य, विहार आदि थासय् वनाः नाम संगीति पाठ, यायेगु नापं तुतः ब्वनेगु याइ । थ्व झ्वलय् स्वनिगःया बौद्ध धर्मावलम्बित धाः, नाय्खि, धिमय्, थानाः चैत्य परिक्रमा यायेत सुथ न्हापां दनाः वनी ।

थुकथं हे गुंला क्यनिगु झ्वलय् श्रावण २२ गते मंगलवाः केशचन्द्र गुंलाबाजं खलकं यटखाया नासः द्यःयाथाय् विधिवतरुपं पूजा याःगु दु । यटखास्थित नासःद्यःया देगलय् गुंलाबाजं खलःया सकल जःपिं मुना पूजाआजाया ज्या न्ह्याकूगु खःसा थःथःगु आस्थाकथं नासः द्यः समक्ष प्रार्थना नं याःगु खः । थुगु हे अवसरय् नासः द्यःछें क्वय् बाजं खलःया युवापिन्सं नृत्यनाथ ग्वारा नं थाय्गु याःगु खः । थुकथं नृत्यनाथ ग्वारा थाय्गु झ्वलय् बाँसुरी नं पुया ग्वारा थाःगु यात साथ बिउगु खः । नासः द्यःयात वन्दना याय्कथं थुगु ग्वारा थाय्गु याःगु खः । नृत्यनाथ ग्वारा थाय्धुंकाः गुंलाबाजं थानाः न्यत जुकाः इतुंबहालय् वनाः पूजायया प्रसाद ग्रहण याय्गु याःगु ख । नेवाःतय्गु थःगु हे कथंया विशेषतां जाःगु थुगु गुंलाबाजं न्हूपिं प्रशिक्षार्थीपिन्त लच्छियंकं गुंलाबाजं गुरु दिपकमान शाक्यं प्रशिक्षण नं बिइगु ज्या जूगु खः ।

थःगु म्हसीकायात जीवन्तता याना तय्माः धकाः थीथी त्वाःया गुंलाबाजं खलःपिन्सं गुंला लच्छियंकं थःगु तन,मन, धन बिया थुकियात न्ह्याका वयाच्वंगु दु । थुगु गुंलाबाजं नं नेपाःया संगीत ख्यःयात छगू विशिष्टकथंया छाप नं बिया वयाच्वंगु दु । कयौं गुंलाबाजं ह्यःमिपिन्सं गुंलाबाजंयात तसकं हे आदर याना थुकिया निरन्तरताया नितिं न्ह्यानावयाच्वंगु दु ।

अथेहे थ्व गुंला पर्वया लसताय् थनिंनिसें लछितकं द्यः थायेगु नं चलन दु ।

(किपा : सुगतरत्न सिन्दुराकार)