असन्तुष्ट दललिसे छवाः दुने सहमति जुइ : गच्छदार
मधेसी जनअधिकार फोरम लोकतान्त्रिकया नायः विजय कुमार गच्छदारं छवाःया दुने असन्तुष्ट दललिसे सहमति जुइगु धयादीगु दु ।
बुधवाः सुथय् मोरंगया विराटनर विमानस्थलय् पत्रकारलिसे खँल्हायेगु झ्वलय् नायः गच्छदारं उगु खँ धयादीगु खः । वय्कलं असन्तुष्ट दलं न्ह्यब्वःगु मागयात कयाः सहलह जुयाच्वंगुलिं साउन मसान्त तक सहमति जुइगु दावी यानादिल ।
नेता गच्छदारं नेकपा माओवादी नेतृत्वया मोर्चाय् दुथ्याःगु ३३ गू दल व उपेन्द्र यादवया नेतृत्वय् दुगु मोर्चा वार्ताय् वयेधुंकूगुलिं वार्ता याकनं हे निष्कर्षय् थ्यनीगु विश्वास नं प्वंकादिल । वय्कलं सरकार परिवर्तन व प्रधानन्यायाधीस पदपाखें मन्त्रीपरिषदया नायः खिलराज रेग्मीं राजीनामा बीमाःगु बाहेक आन्दोलन यानावयाच्वंगु दलं ल्ह्वंगु न्ह्याथेंजाःगु मागय् सहमति मालेफइगु धयादीगु दु ।
मंसीर ४ गते चुनाव यायेगु कथं सहमती वःसा प्यंगू दल दथुइ जूगु ११ गू बुँदा सहमति व २५ गू बुँदा बाधा अड्काउ फुकाउ आदेश नं परिमार्जन यायेफइगु धयादिसें नायः गच्छदारं मंसीर ४ गतेया चुनावयात अन्तराष्ट्रिय जगतं केन्द्रविन्दुइ तयाः स्वयाच्वंगुलिं चुनाव लिछ्याये मजिउगु खँय् बः बियादिल ।
