इहिपा न्ह्यः बलात्कृत जूम्ह बिचल्ली
इहिपा याये न्ह्यः जूगु बलात्कारपाखें प्वाथय् दुम्ह बाराया छम्ह मिसा विचल्ली जूगु दु । इहिपा याःगु छुं ला लिपा हे प्वाथय् दुगु सीवं बारा पटेर्वा २ या उम्ह मिसायात छेँ नं पितिनाहःगु खः । भाःतया छेँपाखें पितिना हयेवं थःछेँय् च्वना वयाच्वंम्ह उम्ह मिसापाखें म्ह्याय् बूगु खः । इहिपा याये न्ह्यः शम्भु साहया काय् अजय साहपाखें वि.सं. २०६९ साल कार्तिकनिसें थः तःक्वः मछि हे बलात्कृत जुयाच्वंगु वय्कलं कनादीगु दु ।
वि.सं. २०६९ माघ १८ गते बसबरियाया छम्ह मिजंलिसे इहिपा याःम्ह उम्ह मिसां थःत छेँय् याकःचा जूगु इलय् अजयं बलात्कार याःगु धाःगु दु । सुंयात धाल धाःसा छेँजःपिन्त स्यायेगु ख्याच्वः बिउगुलिं थःम्हेस्यां सुयात नं धायेमफूगु नं धाःगु दु । ताःईतक थुगु घटनायात सुचुकातःम्ह मिसां थः छेँपाखें पिहांवयेमाःगुलिं थः मचायात न्याय व अधिकार बीकेत प्रहरी वनागु नं धाःगु दु । मिसां साउन १० गते इलाका प्रहरी ज्याकू सिम्रौनगढ व जिल्ला प्रहरी ज्याकू बाराय् थःत बलात्कार याःम्ह अजय विरुद्ध किटानी जाहेर याःगु दु ।
जिल्ला प्रहरी ज्याकूया प्रहरी निरीक्षक उत्तम प्रकाश बरालं अजयया जाहेरीया लिधंसाय् अजयया विरुद्ध यौनशोषण याःगु किटानी जाहेरी बिउगु पुष्टि याःगु दु । नियन्त्रणय् कयाः छानबिन यायेत इलाका प्रहरी ज्याकू सिम्रौनगढयात पत्राचार याःगु बरालं जानकारी बियादीगु दु ।
पीडकविरुद्ध प्रहरीइ जाहेरी लायेवं घटनायात गामय् मिलेयानाः अपराधीयात त्वःतेगु नितिं षडयन्त्र शुरु जूगु दु । घटनायात गामय् हे मिले यायेमा धकाः स्थानीय न्ह्यलुवाः व अजयया कका हरेन्द्र साह क्रियाशील जूगु दु ।
अथेहे घटनायात त्वपुइगु नितिं गामय् पञ्चायत च्वनाः छुं छुं धेबा बियाः मिलापत्र यायेत दबाब वयाच्वंगु मिसाया अबु गुनासो याःगु दु । घटनायात गामय् मिले यायेमाः धकाः दबाब बिया वयाच्वंम्ह स्थानीय न्ह्यलुवाः मधुसुधन कलवारयात प्रहरीं नियन्त्रणय् काःगु दु ।
इलाका प्रहरी ज्याकूया प्रहरी निरीक्षक किशोरकुमार उपाध्यायं न्यनेकनेया नितिं मधुसुधनयात नियन्त्रणय् कयागु जानकारी बियादीगु दु । वय्कलं यौनशोषण याःम्ह मिजंयात मालेगु ज्या जुयाच्वंगु नं जानकारी बियादीगु दु । (रासस)
