सुआरेजं लिभरपुल विरुद्ध कानूनी प्रकृया न्ह्याकीगु

इंग्लिस प्रीमियर क्लब लिभरपुलं थःत स्थानान्तरण याके मबिउगुलिं स्ट्राइकर लुइस सुआरेजं लिभरपुल विरुद्ध कानूनी प्रकृया न्ह्याकीगु जूगु दु । मेगु इंग्लिस प्रीमियर क्लब आर्सनलं उरुग्वेया स्ट्राइकर सुआरेजया नितिं ४ गू करोड डलरया प्रस्ताव याःसां नं उगु प्रस्तावयात लिभरपुलं अस्वीकार याःगु खः ।

लिभरपुल च्याम्पियन्स लिगया नितिं छनोट जुइत ताःमलायेवं सुआरेजं लिभरपुल त्वःतेगु इच्छा क्यंगु खः । स्पेनिस क्लब रियल मेड्रिडं नं सुआरेजयात दुकायेगु इच्छा क्यंगु खःसां नं सुआरेज धाःसा आर्सनल लिसे सहमति लिक्क थ्यंगु बेलायती सञ्चार माध्यमं न्ह्यथंगु दु ।

थःत ४ गू करोड डलर स्वयां अप्वः धेबाया प्रस्ताव वःसा लिभरपुल त्वःतेगु नितिं स्वतन्त्र जूगु खँ करारनामाय् दुसां नं लिभरपुलं थःत आर्सनल वंके मबिउगु सुआरेजया धापू खः । तर लिभरपुलं धाःसा आर्सनलया प्रस्ताव सुआरेजयात जानकारी याकेगु थःपिनिगु दायित्व जूसां नं स्थानान्तरण यायेगु वा मयायेगु धइगु खँ क्लबया अधिकार जूगु दावी याःगु दु ।

स्ट्राइकर सुआरेजं वंगु सिजनय् लिभरपुलया नितिं ३० गू गोल याःगु खः । वंगु सिजनया अन्त्यय् कासाया झ्वलय् चेल्सीया इभानोभिचयात वान्याना बीवं सुआरेजयात १० गू कासा म्हितेत प्रतिबन्ध तःगु खः ।

More Stories Like this