चुनाव लिछ्याये मजिउगु एमालेया निष्कर्ष
नेकपा एमालें निक्वःगु संविधानसभाया चुनावया तिथि लिछ्याये मजिउगु क्वःछिउगु दु ।
मंगलवाः च्वंगु एमाले स्थायी समितिया मुँज्यां चुनाव छुं नं हालतय् लिछ्याये मजिउगु निष्कर्ष पिकासें वहे कथं मेमेगु दल नं न्ह्याःवनेमाःगु धाःगु दु ।
देश चुनावया माहोलय् वनेधुंकूगुलिं छुं नं त्वहः तयाः चुनावया तिथि लिछ्याये मजिउगु धासें मुँज्यां चुनावया विपक्षय् खनेदुगु नेकपा माओवादी लिसेंया मेमेगु दलयात चुनावय् ब्वति कायेकेगु नितिं उमिगु मागयात सम्बोधन यायेमाःगु नं क्वःछिउगु दु ।
मुँज्याय् घोषणा यानातःगु तिथिइ चुनाव यायेगु शर्तय् जक चुनावया विपक्षय् दुगु दललिसे वार्ता न्ह्याकेगु निष्कर्ष पिकाःगु एमाले छ्याञ्जे शंकर पोखरेलं जानकारी बियादीगु दु ।
अथेहे मुँज्याय् वइगु केन्द्रीय कमिटीया कार्यसूचिया खँय् नं सहलह जूगु न्वकू विद्यादेवी भण्डारीं जानकारी बियादीगु दु । साउनया न्हापांगु वालय् छुं दिंया नितिं च्वंगु केन्द्रीय कमिटिया मुँज्या दथुइ हे स्थगित जूगु खः ।
थ्वहे झ्वलय् एमाले नायः झलनाथ खनाल अमेरिकापाखें लिहांवयेसातकि केन्द्रीय कमितिया मुँज्या च्वनेगु कथं एमालें तयारी यानाच्वंगु सीदुगु दु ।
