किपुलिई मंकाः बाखं गोष्ठी जुल
प्रतिभा साहित्य परिवारया खुइगुक्वःगु प्रतिभा साहित्यिक गोष्ठी बाखं दबूलिसे मंकाः ग्वसालय् जुल ।
शनिवाः किपूया मंगल उच्च मा.वि.इ जूगु थुगु बाखं गोष्ठीइ न्हूपिं व पुलांपिं बाखं च्वमिपिंसं ब्वति कयादीगु खः ।
नेवाः लागालिसें थीथी थासय् नेपालभाषा साहित्ययात च्वन्ह्याकेगु तातुनाकथं न्ह्याकाच्वंगु नेपालभाषाया थुगु बाखं गोष्ठीइ मुक्कं नीछपु बाखं दुतवःगु खःसां १७ म्ह बाखँ च्वमिपिंसं जक थःथःगु बाखं ब्वना न्यंकूगु खः ।
कलाकारपिं बीरप्रसाद भंसारी, गुजे मालाकार व मीना महर्जनपिंसं म्ये हाला ज्याझ्वलय् लसकुस यानादीगु खः ।
पाहाँ कथं बाखं दबूया भाजु लक्ष्मण राजवंशी, प्रतिभा साहित्य परिवारया संस्थापक नायः व संरक्षक भाजु राजभाई जःकःमि झायादीगु खःसा बाखं दबूया मय्जु सुजिता माहाजुं बाखं दबूया म्हसिका लिसें भिंतुना न्वचू बियादीगु खः ।
प्रतिभा साहित्यिक परिवारया नायः भाजु ज्ञानबहादुर महर्जन “नेवाः”या नायःसुइ न्ह्याःगु थुगु गोष्ठी परिवारया छ्याञ्जे भाजु श्रीकृष्ण तण्डुकारं लसकुस यानादीगु खःसा भाजु नजरराम महर्जनं सुभाय् बियादीगु दु । ज्याझ्वः परिवारया ल्यू दांभरि मय्जु रश्मि नापितं न्ह्याकादीगु खः ।
