वर्ड फ्लू नियन्त्रणया नितिं सरकारया उजं
सरकारं वर्ड फ्लू नियन्त्रण नापं रोकथामयात प्रभावकारी दयेकेत सम्बद्ध अधिकारीतय्त उजं बियादीगु दु ।
मन्त्रीपरिषदया नायः खिलराज रेग्मीं स्वास्थ्य व कृषिमन्त्रीलिसे सहलहय यानादिसें वर्ड फ्लू ल्वय् नियन्त्रणय् सरकारी तहपाखें जुयाच्वंगु कुतः व उकिया लिपांगु अवस्थाया बारे जानकारी कयादीगु खः । नायः रेग्मीं वर्ड फ्लूया नियन्त्रण व उगु ल्वय्या संक्रमण न्यंनावंके मबीत फूकथं उपाय नालेत व नियन्त्रणया नितिं फुक्क कुतः यायत नं उजं बियादीगु रेग्मीया प्रेस सल्लाहकार विमल गौतमं जानकारी बियादीगु दु ।
ल्वय्यात नियन्त्रण यायेगु ज्यायात उच्च प्राथमिकताय् तयेत नापं कार्यान्वयन अवस्थाया प्रभावकारी अनुगमन व निगरानी तयेत तकं मन्त्रीपरिषदया नायः रेग्मीं इनाप यानादिल । लिपांगु दिनस स्वनिगःया थी थी थासय् दुगु खाया फार्मय् बर्ड फ्लू खनेदुगु खः ।
