निर्वाचन आयोगपाखें निर्वाचन ज्याझ्वः पितबिल
मंसीर ४ गते जुइत्यंगु संविधानसभाया चुनावया नितिं प्रत्यक्षपाखेया उम्मेदवारी दर्ता असोज १० गते याइगु जूगु दु । अथेहे समानुपातिक चुनावय् ब्वति कायेत राजनीतिक दलं मनोनयन दर्ता यायेगु दिं असोज ७ गते क्वःछिउगु दु ।
निर्वाचन आयोगं विहिवाः स्वीकृत याःगु निर्वाचन ज्याझ्वः कथं समानुपातिक चुनावय् ब्वति कायेत राजनीतिक दलं मनोनयन दर्ता यायेगु ई असोज ७ गते क्वःछिउगु दु । दलं सुथसिया झिताः इलंनिसें सनिलया न्याताः ईतक निर्वाचन आयोगया केन्द्रीय ज्याकुथि कान्तिपथय् वनाः उम्मेदवारी दर्ता यायेफइ ।
८ गते नामावली दलया नां सार्वजनिक याइसा ९ गते मनोनयन लित कायेगु नापं १० गते अन्तिम नां धलः पिथनेगु व चुनाव चिं बीगु जुइ । ज्याझ्वःया धलः कथं असोज ११ गते राजनीतिक दलं उम्मेदवारया बन्द सूचि न्ह्यब्वयेमाः । असोज ३१ गते उम्मेदवारया बन्द सूचि सार्वजनिक याइगु व दावी विरोध लित कायेगु प्रकृया पूवनेधुंकाः कार्तिक २३ गते अन्तिम नांधलः पिथनी ।
अथेहे प्रत्यक्षपाखे उम्मेदवारतय्गु मनोनयन दर्ता असोज १० गते निर्वाचन अधिकृतया ज्याकुथि जिल्ला सदरमुकामय् जुइ । ११ गते मनोनयन पौ दर्ताया सूचि पिथनीसा १२ गते दावी विरोध, १३ गते जाँचबुझ, व १४ गते उम्मेदवारया नांधलः पिथनेगु ज्याझ्वः दु । अथेहे १५ गते उम्मेदवारया नां लित कायेगु व १६ गते अन्तिम नांधलः पिथनेगु निर्वाचन आयोगं न्ह्यथंगु दु । निर्वाचन तालिका कथं प्रत्यक्षपाखेया उम्मेदवारतय्त असोज १८ गते चुनाव चिं बीगु ज्याझ्वः दु ।
