प्रतिभाया ख्वीच्याक्वःगु साहित्य मुँज्या

प्रतिभा साहित्यिक परिवारया ख्वीच्याक्वःगु साहित्यिक मुँज्या नकितिनि क्वचाल । परिवारया नायः ज्ञान बहादुर नेवाःया सभाध्यक्षताय् न्ह्याःगु उगु मुँज्याय् नेपालभाषाया मुक्कं १५ म्ह च्वमिपिन्सं थःथःगु च्वसु न्यंकादीगु खः ।

मुँज्याय् नेपालभाषाया नांजाःम्ह साहित्यकार मदनगोपाल प्रधान मू पाहां व समीक्षक कथं झायादीगु खः । ज्याझ्वलय् ब्वंगु थी थी च्वसुया समीक्षा यायेगु झ्वलय् भाजु प्रधानं थौंकन्हय् थी थी कथं साहित्य च्वयेगु चलन वयेधुंकूगुलिसें साहित्य च्वयेबलय् अःपूगु भाषा व थःम्हेस्यां थियागु विषय प्रष्ट जुइक च्वयेगु हे साहित्य सिर्जना खः धयादिल । लिसें ज्याझ्वलय् थी थी साहित्यिक च्वसू ब्वनादीपिं फुक्कसित सुभाय् बियादिसें भाजु प्रधानं थज्याःगु ज्याझ्वलय् थःम्हं फूगु ग्वाहालि यायेत थः न्ह्याबलें तयार दुगु नं धयादिल ।

साहित्यिक परिवारया संस्थापक नायः राजभाई जकःमि नं उपस्थित दुगु उगु ज्याझ्वलय् सुरज ब्यञ्जनकार, सुरेन्द्र तुलाधर, राजेन्द्र कुमार पुता, रामभक्त 'रमझम', नजरराम महर्जन, शम्भुराम महर्जन, अर्जुन नेपाःमि, भरत महर्जन, जितेन्द्र महर्जन, सुवर्ण महर्जन, ज्ञान बहादुर नेवाः, पी.के. श्रेष्ठपिन्सं थःथःगु च्वसु ब्वनाः न्यंकादीगु खः । (सन्ध्या टाइम्स)

More Stories Like this