शान्ति सुरक्षा कमजोर जूगुलिं फोरमपाखें सरकारया ध्यानाकर्षण
उपेन्द्र यादव नेतृत्वया मधेसी जनअधिकार फोरमं शान्ति सुरक्षा कमजोर जुजुं वनाच्वंगु धासें सरकारया ध्यानआकर्षण याःगु दु । फोरमं थः कार्यकर्तातय्त स्यायेगु क्रम अप्वःया वंगु धासें केन्द्रीय नापं जिल्ला नेतातय्गु सुरक्षाया ब्यवस्था यायेत तकं सरकारलिसे माग याःगु दु ।
फोरमया नायः यादवपाखें शनिवाः मन्त्रीपरिषदया नायः खिलराज रेग्मीयात ज्ञापन पौ लःल्हासें उकथं माग याःगु खः । उगु ज्ञापनपतिइ देशया सुरषा स्थिति झं झं स्यनावनाच्वंगु व देशया आम नागरिक थःत असुरक्षित महसूस यानाच्वंगु वर्तमान अवस्थाय् मधेसया स्थिति झं ग्यानापुसेच्वंगु न्ह्यथनातःगु दु । अथेहे छखे मधेसय् खटेजूपिं सुरक्षाया शीर्ष पदाधिकारी थःगु कर्तब्ययात कयाः जिम्मेवार जूगु खनेमदुसा मेखे मधेसया सशस्त्र पुचलं देशया वर्तमान राजनीतिक स्थितिया फाइदा कासें फुक्क मधेसय् आतंक न्यंकाच्वंगु दु, उगु ज्ञापनपतिइ न्ह्यथनातःगु दु ।
थ्वहे झ्वलय् फोरम नेता यादवं सरकारी सुरक्षा पुचःतय्गु तकं अपराधिक पुचःलिसे प्रत्यक्ष अप्रत्यक्ष कथं साँठगाँठ दुगु द्वपं तकं बियादिल ।
