चुनाव मयःपिं जनतापाखें तिरस्कृत जुइगु : देउवा
नेपाली कांग्रेसया वरिष्ठ नेता शेरबहादुर देउवां चुनाव मयःगु शक्ति जनतापाखें तिरस्कृत जुइगु धयादीगु दु ।
नेपाल दलित संघया जिल्ला नायः व छ्याञ्जेपिनिगु मुँज्यायात शनिवाः नगरकोटय् सम्बोधन यानादिसें नेता देउवां उगु खँ धयादीगु खः । वय्कलं आः नेपाःमितसें चुनाव याये चाहेजूगुलिं थुकिया विकल्प मदुगु नं धयादिल ।
चुनावय् मवनीपिन्त जनतां हे उमिगु हैसियत क्यनाबीगु धयादिसें नेता देउवां फुक्क दलयात चुनावय् वयेत नं इनाप यानादिल । वय्कलं जनताया दक्कलय् तःधंगु अधिकार मतदान जूगुलिं थुकियात सुनानं पनेमफइगु दावी तकं यानादिल ।
नेपाली कांग्रेसं दलित अधिकारयात स्थापित यायेगु नितिं विधान संशोधन यानागु लुमंकादिसें नेता देउवां थःत क्रान्तिकारी धाइगु पार्टीं ब्यवहारिक कथं छुं नं ह्यूपाः महःगु नं द्वपं बियादिल ।
