चुनावया विराध याःपिं जनपक्षीय जुइमफइगु
एकीकृत नेकपा माओवादीया प्रबक्ता अग्नी सापकोटां देश चुनावया प्रकृयाय् न्ह्याःवनेधुंकूगुलिं छुं छुं राजनीतिक दल वा पुचलं विरोध यायेवं मदीगु धयादीगु दु ।
पार्टी केन्द्रीय ज्याकू पेरिसडाँडाय् पत्रकारतलिसे नियमित नापलायेगु ज्याझ्वलय् प्रबक्ता सापकोटां उगु खँ धयादीगु खः । वय्कलं देशया आवश्यकता चुनाव जूगु व उकिया विरोध याइगु छुं नं अर्थय् जनपक्षीय जुइमफइगु तकं दावी यानादिल ।
संविधानसभाया चुनावया लकस दयेकेत उच्चस्तरीय राजनीतिक समितिया पुनःगठन व सरकारया तकं पुनःगठन यायेत मू मू राजनीतिक दलत तयार जुइधुंकूगु अवस्थाय् हाकनं चुनावया विरोध यायेगुया छुं नं अर्थ मदुगु प्रवक्ता सापकोटां धयादीगु दु । वय्कलं गोलमेच सम्मेलन वा मेमेगु छुं नं बहानाय् न्ह्याःवनेधुंकूगु चुनाव प्रकृया स्यंकेत स्वल धाःसा देश झन संकटया भुमरीइ लाःवनीगु धयादिल ।
संविधानसभाया चुनाव राष्ट्रिय आवश्यकता व राजनीतिक संक्रमण अन्त्य यायेगु बांलाःगु ह्वःताः जूगु प्रवक्ता सापकोटाया धापू खः ।
