नेपाः साफ यू-१६ फुटबलया फाइनलय्

नेपाः येँय् न्ह्यानाच्वंगु निक्वःगु साफ यू-१६ च्याम्पियनशीप फुटबल कासाया फाइनलय् दुहांवंगु दु ।

येँया दशरथ रंगशालाय् शनिवाः जूगु न्हापांगु सेमीफाइनल कासाय् बंगलादेशयात १ गूया विरुद्ध ५ गू गोलं बुकूसें न्हापांखुसी उपाधि लिक्क थ्यंगु खः । थ्वस्वयां न्ह्यः येँय् जूगु न्हापांगु कासाय् नेपाः सेमीफाइनल तक थ्यंगु खःसा स्वंगूगु थासय् सीमित जूगु खः ।

कासाय् नेपालं शुरुनिसें हे गोलया वर्षा याःगु खः । च्यागूगु मिनेटय् सुजन लिम्बुया गोलपाखें न्ह्यःने लाःगु नेपाः २० गूगु मिनेटय् विमल घर्ती मगरया गोलपाखें अग्रता निदुगं याःगु खः । उकिया स्वंगू मिनेट लिपा हे अञ्जन विष्टं गोल यासें नेपाःयात स्वंगू गोलं न्ह्यःने लाकल ।

न्हापांगु हाफय् स्वंगू गोलं न्ह्यःने लाःगु नेपालं निगूगु हाफय् निगू गोल यायेत ताःलाःगु खः । ५६ गूगु मिनेटय् बंगलादेशी कासामिं याःगु आत्मघाती गोलया नापनापं प्यंगू गोलं न्ह्यःने लाःगु नेपाः उकिया प्यंगू मिनेटय् हे सुजन लिम्बुया ब्यक्तिगत निगू गोललिसें न्यागू गोलं न्ह्यःने लाःगु खः ।

थ्वहे झ्वलय् नेपाः फाइनल थ्यनीगु धुक्क जूगु लिपाया कमजोरीया फाइदा कासें बंगलादेशं ६५ गूगु मिनेटय् गोल यात गुगु सान्त्वना गोलय् परिणत जुल ।

आः नेपालं उपाधिया नितिं भारत व अफगानिस्तान दथुइ जुइगु कासाया विजेतालिसे धेंधेंबल्ला याइ । निगूगु सेमीफाइनल कन्हय् आइतवाः जुइ ।

More Stories Like this