झुम्काय् धिमे बाजं प्रशिक्षण ज्याझ्वः न्ह्यात

Posted on Sat Jul 27, 2013 5:40 pm NST

नेवाः तजिलजिया विकास याःगु तातुना नीस्वगु झुम्का नेवाः पुचःया ग्वसालय् धिमे बाजं प्रशिक्षण ज्याझ्वः झुम्का बजारय् न्ह्याःगु दु ।

दिल्लागा चतुर्थी कुन्हु निसें न्ह्याःगु उगु ज्याझ्वलय् मुक्क ४०म्ह प्रशिक्षार्थी दुगू खँ भुम्का नेवाः पुचया नायः भाजु केदार श्रेष्ठं कनादिगु खः । नेवाः देय् दबूया ग्वाहालिइ न्ह्यायेत्यंगु उगु प्रशिक्षण ज्याझ्वलय् प्रशिक्षक कथं स्वनिग नं शान्त महर्जन झायादिगु खः । अथेहे प्रशिक्षण ज्याझ्वलय् हेमन्त राजभण्डारीं थःगु मां अबुया लुमन्ति यासें निगः थिमे बाजं उपहार बियादिगु खः ।

झुम्का नेवाः पुचया नायः भाजु केदार श्रेष्ठया नायसुई न्ह्याःगु उगु ज्याझ्वलय् मुपाहाँ कथं श्याम कुमार श्रेष्ठ, पाहाँ कथं भाजु शान्त महर्जन, सल्लाहाकरपिं भाजु चन्द्र बहादुर श्रेष्ठ, भाजु राम बहादुर श्रेष्ठ व भाजु दिल कुमार वज्राचार्य झायादिगु खः ।