झी कलाकार रामशेखर नकःमियात तःजिक हन

नेपालभाषा साहित्य व कलाकारिता क्षेत्रया बरिष्ठ कलाकार रामशेखर नकःमियात छगू ज्याझ्वःया दथुइ तःजिक हंगु दु । झी कलाकार रामशेखर नकःमि हना ज्याझ्वःया संयोजनय् मू पाहाँ नेपालभाषा एकाडेमिका चान्सलर नापं संस्कृतिविद् डा. सत्यमोहन जोशीं झी कलाकार नकःमियात नागरिक अभिनन्दन यानादीगु खः । हना ज्याझ्वःया सहलह कथं प्यंगू दर्जन संघसंस्थाया नां छपाः हे हनापतिइ दुथ्याका लःल्हाःगु हना पौ नापं स्वंगू लख तकाया दां म्हिता नं लःल्हाःगु खः ।

झी कलाकार राम शेखर नकःमि हना ज्याझ्वःया कजि राजेन्द्रमान शाक्यया सभापतित्वय् न्ह्याःगु हना ज्याझ्वलय् मू पाहा“ जोशीं त्वाःदेवाय् मत च्याका ज्याझ्वःया उलेज्या यानादीगु खःसा मिसा पुचःपाखे ख्ये“ सगं बिया ज्याझ्वः न्ह्याकूगु खः ।

ज्याझ्वलय् जनकवि दुर्गालाल श्रेष्ठ रामशेखर नकःमिया सम्मानय् च्वयादीगु म्ये व भिडियो म्यागेजिन नं न्ह्यब्वःगु खः । अथेहे कलाकार नकःमिया आत्मकथा सफू नं बिमोचन याःगु खः । उगु हे ज्याझ्वल् कवि राजभाइ जकःमि कलाकार नकःमियात भिंतुना बिया च्वयादीगु चिनाख“ नं न्ह्यब्वादीगु खः ।

ज्याझ्वलय् नेपालभाषा परिषद्या नायः फनिन्द्ररत्न बज्राचार्यं कलाकार नकःमिया साहित्यिक पक्षया बारे बिबेचना यानादिलसा जनकवि दुर्गालाल श्रेष्ठं तयार यानादीगु नागरिक अभिनन्दन पौ ब्वना न्यंकादिल । अथेहे मू पाहाँ जोशीं राम शेखर नकःमिया बारे न्ववानादिल ।

ज्याझ्वलय् अभिनन्दित जुयादीम्ह झी कलाकार नकःमिं थः थुगु विधाय् गुकथं दुहाँवया अले गुकथं थना थौं अभिनन्दित जुइदत धैगु धकाः थःगु जीवनया बाखं छत्वाचा कनाः न्हिकादिल ।

नेपालभाषा साहित्य, ख्यालः, निर्देशन, नाटक विधाय् थःगु जीवन पानादीम्ह बरिष्ठ कलाकार नकःमियात हना ज्याझ्वलय् हने न्ह्यः वय्कःया हे छेँ ख्वप इलाछेँ बाजागाजा नापं मोटरसाईकल ¥याली याना ख्वप देय्, थिमि देय्, यल देय्या थीथी थाय् चाःहिका येँ देय्या न्हूबजारय् च्वंगु नेपाः ब्यांकेटय् नागरिक सम्मान याःगु खः ।

News Location: