एअर एसियापाखें खुसिवालं पीडिततय्त आर्थिक ग्वाहालि
मदिक्क न्यादँतक हलिंया उत्कृष्ट बजेत एअरलायन्स जुइत ताःलाःगु एअर एसियां नेपालय् खुसिवालं व चलखं विस्थापित छेँजःया नितिं न्यागू लख तकाया ग्वाहालि याःगु दु ।
प्रधानमन्त्री दैवी प्रकोप राहत कोषय् उगु धेबा जम्मा याःगु दु । एअर एसिया एक्सया अपरेशन डाइरेक्टर क्याप्टेन अजनुद्दिन शाहं न्यागू लख तकाया चेक शुक्रवाः मन्त्रीपरिषदया नायः खिलराज रेग्मीयात वय्कःया हे ज्याकुथि सिंहदरवारय् लःल्हाःगु खः । उगु ज्याझ्वलय् निर्देशक शाहं नेपालय् एअर एसियाया उडान शुरु जूगु दच्छि क्यंगु झ्वलय् संस्थागत सामाजिक उत्तरदायित्व अन्तरगत खुसिवाः व चलखं पीडिततय्त ग्वाहालि यानागु जानकारी बियादिल ।
थ्वहे झ्वलय् मन्त्रीपरिषदया नायः रेग्मीं ग्वाहालिया कयाः एअर एसियायात ब्यक्तिगत व नेपाः सरकारपाखें सुभाय् देछानादिसें एअर एसियायात सफलताया नं कामना यानादीगु दु । ज्याझ्वलय् नेपाःया नितिं मलेसियाली दूतावासया चार्ज डे अफयेर, इन्सेन्टिभ ग्रुपया निर्देशकपिनिगु उपस्थिति दुगु खः ।
सन् २०१२ जुलाई ३ तारिखनिसें नेपालय् उडान शुरु याःगु एअर एसिया एक्सं थौंकन्हय् वालय् न्यान्हु क्वालालाम्पुर येँ उडान यानावयाच्वंगु दु ।
