अख्तियारपाखें विशाल बजारय् छापा
अख्तियार दुरुपयोग अनुसन्धान आयोगं विशाल बजार कम्पनी लिमिटेडय् छापा मारेयानाः भ्वँ नियन्त्रणय् काःगु दु ।
भवन दुगु ८ गू रोपनी ४ गू आना जग्गा बापत वइगु धेबाया शेयर नेपाः सरकारया नामय् खुलाया दुने कायम यायेत सर्वोच्च अदालतं स्वदँ न्ह्यः ब्यूगु उजं कार्यान्वयन मजूगु व पसः बालं ब्यूगु इलय् अनिमियतता जूगु आशंकाय् अनुसन्धानया नितिं भ्वं नियन्त्रणय् काःगु अख्तियारं न्ह्यथंगु दु ।
विशाल बजार कम्पनी लिमिटेड सरकारी स्वामित्वय् दुगु थी थी संस्थाया नामय् ३४ गू प्रतिशत दुगु संस्था जूगुलिं उगु लिमिटेडं याइगु ज्याखँ सार्वजनिक खरिद ऐन २०६३ व सार्वजनिक खरिद नियमावली २०६४ आकर्षित जुइगु अख्तियारं धाःगु दु ।
पसः बालं बीगु इलय् पारदर्शी नापं प्रचलित कानूनया परिपालना मजू धकाः सर्बोच्चया २०६७ साल बैशाख २४ गतेया फैसलापाखें स्पष्ट जुइधुंकूगु अख्तियारया सह न्यायाधिबक्ता नापं प्रबक्ता श्रीधर सापकोटां पिथंगु विज्ञप्ती न्ह्यथनातःगु दु ।
विशाल बजारय् स्वसः व पीखुगू पसः दु ।
