लुमन्ति दबूया न्याक्वःगु न्हूधाः
नेपालभाषा स्नातकोत्तर ब्वँमिपिनिगु संस्था लुमन्ति दबूया शुक्रवाः छगू ज्याझ्वःया दथुइ न्याक्वःगु न्हूधाः जुल ।
ज्याझ्वःया मूपाहां नापं नेपालभाषा केन्द्रीय विभागया नायः सह प्रा. तुलसीलाल सिंहं उलेज्या यानादिसें नेपालभाषा ख्यःयात ब्वँमिपिनिपाखें थी थी ज्याय् न्ह्यचिलेमाःगु खँय् बः बियादीगु दु ।
लुमन्ति दबूया नायः सुनीता राजभण्डारीया सभाध्यक्षताय् जूगु ज्याझ्वःया न्हापांगु ब्वय् छ्याञ्जे किशोर नेपालीं सांगठनिक प्रतिवेदन व दांभरि पतम बज्राचार्यं आर्थिक प्रतिवेदन न्ह्यब्वयादीगु खः ।
थ्वहे झ्वलय् पुलांम्ह नायः मोहन कृष्ण श्रेष्ठया सभाध्यक्षताये न्ह्याःगु निगूगु चरणया ज्याझ्वलय् न्हूगु ज्यासना पुचः नीस्वनेगु ज्या जूगु खः ।
न्याक्वःगु न्हूधाः कथं नायः बाबुराजा महर्जन, निम्ह न्वकू नजुमा राजभण्डारी व दयाराम श्रेष्ठ, छ्याञ्जे सरीता महर्जन, ल्यू छ्याञ्जे आनन्द कृष्ण ताम्रकार व दांभरि लक्ष्मी शोभा नापित निर्वाचित जुयादीगु दु ।
अथेहे दुजलय् दीपना राजोपाध्याय, शर्मिला महर्जन, रविन्द्र ताम्रकार, गोविन्द हरि श्रेष्ठ व विभागपाखें पदेन दुजः कथं राजीत बहादुर श्रेष्ठ च्वनादीगु दु । अथेहे निवर्तमान नायः कथं सुनीता राजभण्डारी च्वनादीगु दु ।
