द्वन्दया झ्वलय् रासायनिक ल्वाभःया छ्यलाबुलायात कयाः वार्ता जुइगु

सिरियाय् न्ह्यानाच्वंगु द्वन्दया झ्वलय् रासायनिक ल्वाभःया छ्यलाबुला जूगु धइगु विषयस वार्ता यायेग नितिं संयुक्त राष्ट्र संघीय दूत विहिवाः सिरिया थ्यंगु दु । राष्ट्र संघया निम्ह दूत सिरियाया राजधानी दमास्कस थ्यंगु थी थी अन्तराष्ट्रिय समाचार संस्थां न्ह्यथंगु दु ।

रासायनिक ल्वाभः छ्यलाबुला सम्बन्धि अध्ययन यायेगु नितिं सिरिया थ्यंपिं स्वीडेनया बैज्ञानिक अके सेल्सटोम व संयुक्त राष्ट्र संघया निशस्त्रीकरण सम्बन्धि ज्याझ्वःया प्रमुुख एन्जेला कानें हिंसाया झ्वलय् सरकारी सेनां छ्यःगु ल्वाभलय् रासायनिक नापं घातक बस्तुया छ्यलाबुलायात कयाः अनुसन्धान याइ ।

सिरियाया प्रतिपक्षी विद्रोहीतसें थ्यंमथ्यं २८ ला न्ह्यःनिसें न्ह्यानाच्वंगु हिंसात्मक आन्दोलनया झ्वलय् अनया सेनां रासायनिक बस्तु तयातःगु घातक ल्वाभः छ्यलाच्वंगु जानकारी बिउगु खः ।

सिरियाय् सन् २०११ या मार्च महिनानिसें राष्ट्रपति बसार अल असदया राजीनामाया माग यासें न्ह्याःगु शान्तिपूर्ण आन्दोलन आः धाःसा गृहयुद्धय् परिणत जुइधुंकूगु दु । आन्दोलनया झ्वलय् थ्यंमथ्यं छगू लख स्वया. अप्वः मनूत सीधुंकूगु दुसा द्वलंद्वः नागरिक बेपत्ता व उलिहे ल्याखय् घाःपाः जूगु न्ह्यथंगु दु ।

सिरियाय् जुयाच्वंगु रक्तपात दिकेगु नितिं वइगु महिनाय् जेनेभाय् शान्ति सम्मेलन याइगु जूगु दुसां उकिया नितिं तिथि धाःसा अझं क्वःछिउगु मदुनि ।

More Stories Like this