जनजाति आन्दोलनया न्ह्यलुवाः डा. गुरुंग उसाँय् मन्त
आदिवासी जनजाति आन्दोलनया न्ह्यलुवाः प्रा. डा. ओम गुरुंगया निगलं जलास्येँ स्यंगु दु । नेपाल आदिवासी जनजाति महासंघया मू छ्याञ्जे तकं जुयादीधुंकूम्ह डा. गुरुंगया वासः यायेगु नितिं आर्थिक ग्वाहालि यायेत "प्रा. डा. ओम गुरुंग उपचार सहयोग समिति" नीस्वंगु दु ।
तमु ह्युल छोजधी राष्ट्रिय परिषदया नायः रेशम गुरुंगया संयोजकत्वय् नीस्वंगु उगु सहयोग समितिं गुरुंगयात वासः यायेगु नितिं ग्वाहालि यायेत अपिल याःगु दु ।
नेपाः नापं भारतया थी थी अस्पतालया चिकित्सकपाखें याकनं स्वयां याकनं वासः यायेमाःगु पुष्टि यासें डा. गुरुंगया निगलं जलास्येँ प्रत्यारोपण यायेमाःगु चिकित्सकतसें सल्लाह बिउगु दु ।
थ्वहे झ्वलय् समितिं प्रा. डा. गुरुंगया जीवन रक्षा यायेगु राज्यया नं दायित्व जूगुलिं वय्कःया वासः यायेगु फुक्क जिम्मा राज्यं कायेत तकं माग याःगु दु ।
प्रा.डा. गुरुंग त्रिभुवन विश्वविद्यालयया समाजशास्त्र व मानवशास्त्रया प्राध्यापक नापं विभागीय प्रमुख तकं जुयाच्वनादीम्ह खः ।
