दलितपाखें सिंहदरवार घेराउ
मोरंग बेलबारी घटनाया पीडकयात कारवाही यायेत माग यासें दलित अधिकारकःमि नापं राजनीतिक दलया प्रतिनीधितसें विहिवाः सिंहदरवार घेराउ याःगु दु । घटनाया तथ्यसत्य सीकेत सरकारपाखें तत्काल छानवीन समितिया माग यानाः पीडिततय्त क्षतिपूर्ति नापं पीडकयात कडा कानूनी कारवाही यायेमाःगु माग यासें धर्ना च्वंगु खः ।
जबरजस्ती मिलापत्र याकूपिं स्थानीय प्रहरी अधिकारीयात तत्काल कारवाही यायेमाःगु व रौटहटया घटनालिसेंया देय्न्यंकया दलित समुदाययात न्हियांन्हिथं धइथें जुयाच्वंगु जघन्य मानव अधिकार उल्लंघनया घटना हाकनं जुइकेमबीत नेपाल सरकारपाखें याकनं माःकथंया पलाः ल्ह्वनेत माग याःगु दु । धर्नाय् ब्वति कयादीम्ह दलित गैरसरकारी संस्थाया छ्याञ्जे सुशील विक नं थःपिनिगु मागया सुनुवाइ मजूतले आन्दोलन मदिकेगु धयादीगु दु ।
वंगु साउन ७ गते मोरंगया बेलबारीया माया सार्की व मनोज विश्वकर्मायात स्थानीय जीवन भेटवाललिसेंया सलंसः ल्याखय् वःपिं गांया मनूतसें हाकः पाकाः लाकांमाः क्वखायेकूसें दाःगु खः ।
पीडित मिसां थःत स्थानीय जीवन भेटवालं जबरजस्ती करणी यायेत स्वःगु धासें प्रहरी ज्याकुथी न्यायया नितिं उजुरी बीवं पीडक पक्षं मखुगु द्वपं ब्यूगु धासें दाःगु खः ।
