दलितयात हाकः पाकेगु घटनाय् खुम्हेसित ज्वन
मोरंगया बेलबारीइ दलित न्ह्यलुवा व मिसायात हाकः पाकेगु घटनाय् दुथ्याःपिं खुम्हेसित मुद्दा दर्ता याःगु दु । बलात्कार यायेगु कुतः याःगु धासें उजुरी बीवं तंम्वःपिं गांया मनूतसें छम्ह मिसा व वय्कःया पक्षय् न्ववाःम्ह छम्ह न्ह्यलुवाःयात हाकः पाकाः लाकांमाः क्वखायेकेगु ज्या याःगु खः ।
प्यम्ह मिसा व छम्ह मिजं यानाः खुम्हेसित ज्वनाः सार्वजनिक अपराध ऐन अन्तरगतया मुद्दा दर्ता याःगु इलाका प्रहरी ज्याकू बेलबारीया प्रहरी निरीक्षक दीलिप गिरीं जानकारी बियादीगु दु । प्रहरीं बेलबारी ३ या जीवन भेटवाल व अमित भेटवालयात म्हिगः मंगलवाः सनिलय् ज्वंगु दुसा देविता भेटवाल, चन्द्रकला भेटवाल, अम्बिका भेटवाल व कमला भेटवालयात बुधवाः सुथय् नियन्त्रणय् काःगु खः । प्रहरीं उमित १५ न्हुया ई तनाः मुद्दा न्ह्याकूगु न्ह्यथंगु दु ।
थः भाःत पिने देशय् वनाच्वंगुलिं याकःचा बेलबारीइ च्वनावयाच्वंम्ह २३ दँया मिसाम्हेस्यां जीवन भेटवालं थःत बलात्कारया कुतः याःगुलिं प्रहरी ज्याकुथिइ उजुरी तःगु खः । थ्वहे विषययात कयाः दलितं थःपिन्त मखुगु द्वपं बिउगु व सामाजिक कथं बेइज्जत याःगु धासें भेटवाल पक्ष व गांया मनूत मुनाः पीडित मिसायात दायेगु नापं हाकः पाकाः लाकांमाः क्वखायेकूगु खः ।
थ्वहे झ्वलय् राष्ट्रिय मानव अधिकार आयोगं घटनायात कयाः ध्यानाकर्षण जूगु न्ह्यथंगु दु । आयोगं घटना निष्पक्ष छानबीन यानाः सत्यतथ्य सार्वजनिक यायेत सरकारलिसे इनाप याःगु दु । नापं घटनायात थप उत्तेजित जुइके मबीत व घटनाया पीडित व साक्षीतय्गु सुरक्षाया पूर्ण प्रत्याभूति बीत नं आयोगं सरकारलिसे माग याःगु दु ।
उगु घटनायात कयाः आयोगया क्षेत्रीय ज्याकू विराटनगरं घटनाया अनुगमन यानाच्वंगु आयोगया प्रबक्ता बेदप्रसाद भट्टराई न्ह्यथंगु दु ।
