नेपाल कम्युनिष्ट पार्टीया संस्थापक नेता नरबहादुर कर्माचार्य मन्त
नेपाल कम्युनिष्ट पार्टीया संस्थापकपिं मध्ये छम्ह जक ल्यंदुम्ह नेता नरबहादुर कर्माचार्य थौं सुथय् ५ बजे मन्त । वय्कः कर्माचार्य काठमाण्डू मोडल अस्पतालय् वासः याकुयाकुं मदुगु खः । वय्कः ८९ दँ दुम्ह खः । ताःई न्ह्यःनिसें जण्डिस ल्वचं कयाः म्हमफयादीम्ह छम्ह जक म्वानाच्वंम्ह कम्यूनिष्ट पार्टीया संस्थापक दुजः कर्माचार्ययात वासः यायेगु नितिं येँया काठमाण्डू मोडल अस्पतालय् वंगु असार २३ गते भर्ना जुयादीगु खः ।
लुमंकेबह जू, सन् १९४९ अप्रिल २२ खुन्हु नेपाल कम्युनिष्ट पार्टी स्थापना यानादीपिं प्यम्ह हे संस्थापक नेतात नेवाःत खः । पुष्पलाल श्रेष्ठ, नारायण विलास जोशी व निरञ्जनगोविन्द बैद्यद्यलिसें नरबहादुर कर्माचार्य यानाः आः प्यम्हं हे नेतात मन्त ।
थ्वहे झ्वलय् संस्थापक नेता नरबहादुर कर्मचार्ययात बुधवाः हे राष्ट्रिय सम्मानया लिसें पशुपति आर्यघाटय् अन्तिम संस्कार याःगु दु ।
मदुम्ह नेता कर्मचार्ययात अन्तिम श्रद्धाञ्जली बीत एकीकृत नेकपा माओवादीया नायः पुष्पकमल दाहाल प्रचण्ड लिसें शीर्ष नेतात, नेकपा एमालेया नायः झलनाथ खनाल, नेकपा माओवादीया नायः मोहन वैद्य किरण पशुपति थ्यंकादीगु खः । थ्वस्वयां न्ह्यः नेता कर्माचार्यया पार्थिव शरीरयात श्रद्धाञ्जलीया नितिं येँया चकंदबुली तःगु खः । अथेहे एकीकृत माओवादीया सल्लाहकार तकं जुयादीम्ह मदुम्ह कर्माचार्यया सीम्ह श्रद्धाञ्जलीया नितिं पार्टी केन्द्रीय ज्याकू कोटेश्वर पेरिस डाँडाय् तःगु खः ।
थ्वहे झ्वलय् नेपाल कम्यूनिष्ट पार्टीया संस्थापक नेता कर्माचार्य मदुगु शोकय् नेकपा एमालें न्यान्हु तक ध्वाँय् बच्छि क्वछुकीगु जूगु दु । केन्द्रीय ज्याकू लिसें देय् न्यंकया ज्याकुथिइ न्यान्हु तक ध्वाँय् बच्छि क्वछुकेगु व कन्हय् साउन १० गते ज्याकू बन्द यायेगु एमालें न्ह्यथंगु दु ।
एमाले नायः झलनाथ खनालं बुधवाः विज्ञप्ती पिथनादिसें स्वन्हु तक छुं नं कथंया औपचारिक ज्याझ्वः मयायेत फुक्क पार्टी पंक्तिइ उजं बिउगु दु । नेपाल कम्यूनिष्ट पार्टीया संस्थापक दुजः मदुगुलिं नेपाःया कम्यूनिष्ट आन्दोलनय् अपूरणीय क्षति जूगु विज्ञप्तीइ न्ह्यथनातःगु दु ।
(किपा साभार - कृष्ण चखुं)
